1 Reyes 11 - New Testament with Old Testament portions

^1-25 (-)

Jeroboam apu Salomónkan kajerkamu

²⁶ Nukap uwí nagkamasa ai, Nabat ajakua nuna uchiri Jeroboam yaakat Seredánmaya Efraín weantu Salomónjai taká jakua nu apu Salomónkan kajerkauwaiti. Jeroboaman nukurigka waje, nuna nuwa naarigka Serúa tutai ajakuiti.

²⁷ Jeroboam apu Salomónnaka jujai kajerkauwaiti: “Salomón, nina apari David ajakua nuna yaaktari tutain tanishar tentea agkaru ainan sakatar ashimkattsa takak pujau”.

²⁸ Jeroboamka kakaram, tura takatan wakerus takau ajakuiti, imanun Salomón wainkauwaiti. Tumau asamtai José weantu ainan takainakai iin atii, tusa apu amajas apujsauwaiti.

²⁹ Nu tsawantin Jeroboam Jerusalénnum pujau wuwaiti, tuma wesa chichaman etserin Ahías yaakat Silonmaya ajakua nu jaanch yamarman nugkur wean igkugkuiti. Tuma igkuniak ima jimarchik nui pujuina.

³⁰ Nui pujus Ahías jaanch yamaram ukunam awagkeas weamurin jaar doce jiiknaiti.

³¹ Nuna tura Jeroboaman chicharuk: “Jaanch jaarmau aina ju diez jukita”. Israel shuar ainan Yuusri chichaak: Salomónka yamaika apu achattawai, antsu amina diez tribu ainan inarti tusan apu amajsattajme.

³² Antsu Salomónnaka wina umirtin David ajakua nu aneamunam, tura chikich yaakat ainan nagkasau atii tusan yaakat Jerusalénkan etegka asan, chikichik tribunmag inamrati tusan titatjai.

³³ Salomónka winaka nakitrurai, nuwa najanamu Astartén sidonio aina emematin aina nuna, nuiya Moabnumia aina ememattai Quemósan, amonita aina ememattain Milcom tutain nu ainan emematui. Nuna tura asa nina takatrigka winaka shir amajtatsui. Nina apari David wina chichamrun umijakua nunaka nigka umirtatsui.

³⁴ Tuma akaisha ni apu asa inama nunaka ashika atankishtatjai. Nunaka turutsuk David wii etegkamu wina chichamrun ashi umirtuku asamtai, ni iwáku puja nuigka apu atii tusan titatjai.

³⁵ Turasha nina uchiri apu atina nunaka, israelita doce tribu aina nuiyan diez atankittajai, turamtai ame nu aina inartatme.

³⁶ Antsu wina umirtin David ajakua nu weantusha apu jas yaakat Jerusalén wii etegkamua nui wina emematrittsa iruuntai jeasha au asamtai, Salomónka uchiri apu jas chikichik tribunam inamrati tusan inaitustatjai.

³⁷ Tura wii aminka Israel shuar ainanam inamrati tusan apu atii tusan anaikattajme. Turamu asam ame tu nugkanma inamrattsam wakeram nuisha inamrattame.

³⁸ Wii amina tajam nu ashi metek umiakum David shir umikua imatiksam shir takakminka nina yaigkuitaj turusnak amincha yaigtatjame. Turakun amee weantu ainancha David weantu ainan yaigkuitaj turusnak tuke yaigtinaitjai.

³⁹ Salomón wina chichamrun umikchamunam David weantu ainanka waittan susartatjai. Turasha tuke waituka pujuchartinaiti.

⁴⁰ Nu tusa timaun Salomón antuk, Jeroboaman maatjai, tusa tinaiti. Turasha Jeroboamka Egipto nugkanam apu Sisac pujamunam wuwaiti. Tuma nui pujai apu Salomón jakauwaiti.

Salomón jakamu

⁴¹ Salomón apu jasa takasmauri aina, yacha ajakmauri tura ashi ni taká jakmauri aina nuka papi Crónica Salomónnau ajakua nui aarmauwaiti.

⁴² Salomón apu jas yaakat Jerusalénnum Israel shuar ainanam cuarenta uwí inamrauwaiti.

⁴³ Salomón jakamtai nina apari David ajakua nuna yaaktarin Jerusalénnum ikusaru ainawai. Tumamtai nina uchiri Roboam apu jasuiti.