1 Reyes 1 - New Testament with Old Testament portions

Abisag Davidtan kuitamamu

¹ Apu David shir untach jasu asa, tsetsemak waitakai jaanchin yaruakar esekaina. Imatikamsha tsuer nekapeachu.

² Tuma asamtai nina inatairi aina chicharainak: Apu, nuwa agkantu amina kuitamrameak amijai kanartin eaka itami. Nu amini ayaamas kanak tsuer amajtamkai shir kanarminam, tusar tuina.

³ Tuina asar Israel shuar aina pujuinamunam nuwa agkantun eainak wearuiti. Tumawar Sunemnumia nuwa agkantun shirman Abisag naartinan wainkar, apu Davidtan ejétiaruiti.

⁴ Abisagka shir shiram ajakuiti. Nu nuwa apu Davidtan kuitamu jakuiti. Turasha apu Davidka nu nuwanka pegkesha takaschauwaiti.

Adonías apu atajai tusa timau

⁵ Nu tsawantin Davidtan uchiri Adonías naartin Haguitnum akiamu ajakua nu eme anenmamas chichaak: “Wii apu atajai”, tusa tinaiti. Tusa carrete maaniaku wekatai ainan, caballo maaniaku wekatai ainan, tura cincuenta shuar nina kuitamkatin ainajaimak etegkar irumrauwaiti.

⁶ Nuna turamtaisha Davidka, ausha urukamtai aitkam tusagsha uchirinka pegkesha tichauwaiti. Tura nuiyasha Adoníaska pegkeri, wári, nina yachi Absalónka ukurin akina ajakuiti.

⁷ Adonías, Sarvia uchiri Joab ajakua nujai, tura sacerdote Abiatarjai nu ainajai chichaman umikuiti. Tura nu aina yayájakaru ainawai.

⁸ Turasha sacerdote Sadoc, Benaías Joiadá uchiri, Yuusa chichamen etserin Natán ajakua nukesha, David eme anentsa iitai Simí, tura suntar aina Davidtan kuitamajaku aina nusha Adoníasnaka pegke yaigcharu ainawai.

⁹ Chikichik tsawantai Adonías chichaak: “Jiistamku yuatin oveja aina, vaca tsakat nuweram aina maarum inarkatarma”, tusa inamrauwaiti. Nuna tura umik, David akigmaun nina yachi ainan, Judá weantu apu Davidtan inatairi ainan ashi ipaawaiti. Nuna turawa nunaka Roguelim nugkanam entsa pukuni jiinmaunam Zoheletnum ijus kaya uun pujamunam turawaiti.

¹⁰ Turasha Yuus timaun juki etsernun Natánkan, Beníasan, tura suntar Davidtan kuitamin ainanka ipachuiti. Nuiyasha nina yachi Salomónnasha ipachuiti.

¹¹ Nunikmatai Natán Salomónkan nukuri Betsabé ajakua nuna chicharuk: “Ina apuri David nekatsaig, Haguitan uchiri Adonías, apu jasa nuka ameka nekatsme.

¹² Tuma asam jui taata, tumawakmin ame tura amina uchiram Salomónjai atum ayamrumamainan pachisan ujaktajme.

¹³ Apu David pujamunam wetá. Tumam jeaam chicharkum: ‘Apu, ame nekas umiktina nu chichartakum, wii jakamtaigka wina uchir Salomón apu jas inamratnaiti tusam turutmiame. Turasha ¿urukamtai Adoníascha apusha jasa? tusam titá.

¹⁴ Nu tusam apujai chichamin wisha wayattajai. Tuman nunaka nekas tawai tusan titatjai’ ”, tusa tinaiti.

¹⁵ Tusa tama Betsabé apu Davidjai chichastasa wuwaiti. Apu Davidka shir untach asamtai Sunemnumia nuwa Abisag naartin kuitamuk pujau.

¹⁶ Tuma apu David pujamunam jeaa eme anentas iiya asa, nugkan antiastatuk tsuntsumruawaiti. Tumamtai apu David chicharuk: “¿Wari atsumakmea aniam?” tusa tinaiti.

¹⁷ Tusa tama ni chichaak: “Apuru, Yuus umirtaiya nuna naari pachisam chichartakum, wii jakamtaisha wina uchir Salomón apu jas inamratnaiti tusam turutmiame.

¹⁸ Turasha ame timauwa nuka apu jatsaig Adonías apu jasa nuka ameka eke nekatsme.

¹⁹ Ni apu jasu asa jiistamku yurumak yuami, tusa vaca aishmag uun ainan, vaca aishmag tsakat ainan, oveja ainan nukap maarum inarkatarma tusa inatairi ainan tiyi. Tura apu, amina uchiram ainan sacerdote Abiataran tura suntara apuri Joabpan, nu ainan ashi ipaayi. Turasha amina uchiram Salomónkan ipaachai.

²⁰ Nu tu au asamtai ashi Israel shuar aina, apu Davidcha ni jakamtai apu atinnasha yanak etegkat tusa nuna nekawartasa nakarmainawai.

²¹ Apu atin ame etegtsuk jakakminka winaka, wina uchir Salomónjai Adonías mantuattawai”, tusa tinaiti.

²² Nuna tusa Betsabé apujai chichaak pujai, Yuusa chichamen etserin Natán jeawaiti.

²³ Tumamtai Davidta inatairi aina, Yuusa chichamen etserin Natán taayi, tusar Davidtan ujakaru ainawai. Tusa ujakam wayati tusa tima apu pujamunam wayawaiti. Tuma apun eme anentas iiyak nugkan antiastatuk tsuntsumawaiti.

²⁴ Natán Davidtan iniak: “Apuru, ¿ame jakaakmin Adonías apu jastii tusam amek timam?

²⁵ Urukamtai Adoníascha vaca aishmag uun ainan, vaca aishmag tsakat ainan, tura oveja ainajaimak maatarma tusa timatai maawarmatai, amina uchiram ainan, suntara apuri ainan, tura sacerdote Abiataran, nu aina ipaamu asar nijai nuna iruntur yuinak tura umuinak pujusar, senchi chichainak: ¡Adoníaska ina apuriyaiti! tusa tuinawai.

²⁶ Turasha winaka, sacerdote Sadocnasha, tura Benaíasa uchiri Joiadancha ipatmachji. Tura amina uchiram Salomónnasha ipacharai.

²⁷ ¿Apuru, ame jakakmincha yáki apusha atii nuka winaka ujattsukek Adonías apu atii tusam anaikamam?” tusa tinaiti.

Salomón apu atatui tusa David etserkamu

²⁸ Nuna tusa timatai apu David, nina inatairi ainan Betsabé jukirum ataksha jui itatarma, tusa tinaiti. Tusa takai weriar Betsabén juki itawar apu emtin awajsaruiti.

²⁹ Turawarmatai nuna nuwan chicharuk: “¡Yuuska tuke pujutnaiti! Wii waitu pujai agkanmamtikruawa nuna naari pachisan tajame.

³⁰ Yuus, Israel shuar ainati umirtaiya nuna naari pachisan timiajam nunaka: Yamaiya jui umiktatjai. Wii jakamtaigka Salomón amini akinawa nu apu jastatui, tuma ni inamrattawai”, tusa tinaiti.

³¹ Tusa takai apun eme anentas iiyak, Betsabé nugkan antiastatuk tsuntsumaa chichaak: “¡Wina apuru, aminka wika itursag tuke pujusa tusan wakerajai!” tusa tinaiti.

³² Tusa takai apu David, sacerdote Sadoc, Yuusa chichamen etserin Natán, tura Joiadá uchiri Benaía, nu aina untsuka utitarma, tusa nina inatairi ainan ishiakuiti. Turam wear tres shuar ainan juki itawaruiti.

³³ Turawarmatai apu nitan chicharuk: “Apu wijai takau aina nu ujaktarma. Turarum atumjai iruuntrarum, wina uchir Salomón burro wii ekeemsa wekatairua nui ekentrum Guihónnum jukitarma.

³⁴ Tura nui jeamtai sacerdote Sadoc, tura Yuusa chichamen etserin Natán, nu aina aceitejai muuknum ukatrarti. Turawar Israel shuar ainan apuri amajsarti. Nuna turawarmatai yamaram apu etegkaji, tusarum trompeta umpuartarma. Nu umpuakrum senchi chichakrum: ‘¡Salomónka, ame yamaika ina apuri jasume, nukap uwí inamratin atá!, tusarum titarma.

³⁵ Salomón apu amajsarum atum kuitamkarum Jerusalénnum itatarma. Tuma Israel shuar ainan, tura Judá weantu ainancha wii inamainnum ni inarti tusan wii tinu asamtai, wii pujusa inamtairuin waya pujusti’ ”, tusa tinaiti.

³⁶ Nuna tusa takai Joiadá uchiri Berenías apun chicharuk: “¡Ame tame nuka, amina Yuusrum timau tau asaakmin nuke uminkati!

³⁷ Nuiyasha Yuus amina yainmakua turusag, Salomónnasha yaigti. Turamu asa ame apu jasam inamrauwaitam nu nagkamas nina takatrigka pegker atii”, tusa tinaiti.

³⁸ Nuna tusa timatai sacerdote Sadoc, Yuusa chichamen etserin Natán, quereteo shuar Joiadá ajakua nuna uchiri Berenías, tura peleteo shuar, nu aina iruunar apu Davidta burrorin Salomónkan ekeni Guihónnum jukiaruiti.

³⁹ Turawar nui ejéniarmatai sacerdote Sadoc Yuus ememattasa iruuntai jeanam chicham umiktin aarmau egketai ajakua nui egketun kachun tura aceitencha jusauwaiti. Tura Salomónkan muknum aceitejai ukatar apu amajsauwaiti. Nuna turamtai oveja kachurin umpuararu ainawai. Nuna antukar ashi shuar aina senchi chichainak: “¡Salmónka, ame yamaika ina apuri jasume, nukap uwí inamratin atá!” tusar tuina.

⁴⁰ Nuna tusa tuinak Salomónkan patatusar wenak, jujuam ainan umpuina. Tura shir anenak shir senchi chichaina, tumaina asamtai, nugkaka wayawastai tumain jau.

⁴¹ Adonías, tura nina ipaamuri ainajai yurumkan yua umik chichainamun antukaruiti. Tura Joab kachu umpuamun antukuiti, tuma chichaak: “Shuar aina yaaktanam senchi chichainawai”.

⁴² Tusa chichaak wajai, Abiatar ajakua nuna uchiri Jonatán jeawaiti. Tumamtai Adonías chicharuk: “Ameka eme anentsa iitaiyaitme, chicham pegker etserkattsam taume, tuma asam wayata”, tusa tinaiti.

⁴³ Tusa takai Jonatán Adoníasan ayak: “Ina apuri David, Salomónkan apu amajsayi.

⁴⁴ Nuna tura sacerdote Sadocan, Yuusa chichamen etsernun Natánkan, nuiya Joiadá uchiri Beníasan, quereteo ainan tura peleteo, nu ainan Salomón uyuntsatarum tusa tiyi. Tusa takai apu Davidta burrorin ekeniar juki umarai.

⁴⁵ Turawar entsa pukuni jinin Gihón tutai a nui ejeawaruiti. Tumawar sacerdote Sadoc, tura Yuusa chichamen etserin Natánjai muknum aceitejai ukatrar apu amajsarai. Nuna turawar shir aneasar waketrarmayi. Atum nu shir anenak pampainamu antukurme.

⁴⁶ Nuiyasha Salomónka apu pujusa inamtainam waya ekemsayi.

⁴⁷ Tumamtai apu Davidjai takau aina, tura suntara apuri ainasha shir anentainak, Davidtan ame takajakuitan nuna nagkasau Salomónka takasti tusa tiartasa weriarmayi. Tura apu Davidcha Yuusan emematuk peakrin pujusag tsuntsumruamayi.

⁴⁸ Tuma chichaak: ‘Israel shuar ainati ememattai Yuus, wisha eke jatsaig wina uchir aina nuiyan chikichkinak yamai apu amajas wii pujusan inamrauwaitaj nui apujun wainkajai. Tura asamtai Yuus emematiarmi tusa timayi’ ”, tusa tinaiti

⁴⁹ Tusa takai nuna antukar Adonías ipaamu ainaka sapijmainak kuragkaru ainawai. Tumawar wári jiintrar chiki chikichik nita jeen waketraru ainawai.

⁵⁰ Tumawarmatai Adoníaska mantuawaraig tusa Salomónkan ashamak, Yuus ememattasa iruuntai jeanam wayawaiti. Tuma incienso yara epetainam nuna yantamen achimas wajasuiti.

⁵¹ Tumamtai chikichik shuar Salomónkan ujaktasa werinaiti. Tuma jeaari chicharuk: “Adonías amina ashamramak, Yuus ememattasa iruuntai jeanam waya incienso yara epetainam nui umak pujus, apu Salomón wina mantuashtin akugka nekas umiktin asan tajai, mashtatjai tusa turutti turammayi”, tusa ujakuiti.

⁵² Tusa ujakam Salomón chichaak: “Shuar pegker akugka, nina wichigka chikichkiksha ukuinak iyarchattawai. Turasha pegkerchaun takakka, tuke mantamnattawai”, tusa tinaiti.

⁵³ Nuna tusa suntara apuri ainan Adonías Yuusa chichame umiktin aina aarmau egkeamu arca pujamunmayagka jiikrum utitarma, tusa akupkauwaiti. Turam weriar Adoníasan jukiar apu Salomón pujamunam ejém apu Salomónkan eme anentas iiyak tsuntsumruawaiti. Tumamtai jeemin waketkita, tusa apu Salomón tinaiti.