Ôsê 14 - Sech Hadròih

Pariaq Thê Cađac Dèh Tôiq Lôi

¹ Ô Is-ra-ên, wìh hlài ta Chuaq Boc Plình ìh beq, taiq tôiq lôi ìh broq ca ìh tacro.

² Pì waiq khàn dang xìn wa wìh hlài ta Chuaq beq. Doi ca Haq bàu cô: “Xìn cađac rìm bìac ngang dù nhèn con, wa nhàn hlài nhèn xam manoh xa-ŏch, đòiq nhèn con jah dèch bàu manè apôi ti blìa hacùng nhèn.

³ A-si-ri ùh jah dèch dŏih nhèn, nhèn ùh còi hòm axêh tajêh; dua 'mù tì nhèn khoi broq, nhèn pi anoi hòm: ‘Pì raq Boc Plình nhèn,’ ma jah 'màng aih toq ŏi ta ìh raq, èh mangai ma lac jah Ìh xa-ŏch!”

⁴ Au jah broq brêh bìac blàq blènh da wì haq. Au xa-ŏch ca wì haq dìq ca jaq; ma jah 'màng aih can nòih da Au khoi wia khoi ca wì haq.

⁵ Au jah tìah ca diac ngom am ca Is-ra-ên; wì haq jah loh riang tìah ca riang tacreo, wa grap riah tìah ca long hùang nam ta Liban.

⁶ 'Bài hamenh nga da haq jah hlàng loh hangai; can lem da haq tìah ca can lem da long ôliu, hòi xua thùm da haq tìah ca hòi xua thùm da long hùang nam ta Liban.

⁷ Wì ma rìh ŏi ti yàp long haq, jah broq loh 'mau hòm; jah loh riang tìah ca long nho. Tìang 'bang haq jah loh càn tìah ca alac nho Liban.

⁸ Ô Ep-ra-im, Au jah i bìac cleq ca 'bài dua 'mù 'mòh? Au raq khoi rùp bàu wèq ngan ìh. Au tìah ca long preo ma jìang; nhò Au ma ìh jah i plì.

⁹ Mangai leq rabiaq chaq loq bìac cô beq! Mangai leq ragài chaq loq bìac aih beq! Ma jah 'màng aih 'bài trong da Chuaq tajang; 'bài mangai rìh ta-atoq jah cadiang lam ta aih, mahaq 'bài mangai broq tôiq èh tacro ta aih.