Ôsê 11 - Sech Hadròih

Boc Plình Xa-ŏch Ca Is-ra-ên

¹ “Jò Is-ra-ên ŏi nga, Au loq waq ca haq; Au creo con calô Au loh khoi enh Aicàp.

² Au creo ca haq dàng leq, haq mot ca Au dàng aih. Wì haq khoi dèch am ngè tadreo ca Ba-an, wa bùh jreo xua thùm ca dua 'mù.

³ Mahaq cla Au khoi hnài Ep-ra-im cadiang lam, khoi ca'mình haq ta cŏng tì; mahaq wì haq ùh 'nì ca Au khoi broq brêh ca wì haq.

⁴ Au khoi 'nong Is-ra-ên tìah ca mangai i manoh xa-ŏch wa loq waq. Au cô khoi dŏih long ech enh ranŏng wì haq. Au cùp ha'neq 'noh ca wì haq dahwèq caq.

⁵ “Taiq wì haq ùh chìuq wìh hlài ta Au, wa ùh wìh hlài ta Aicàp, èh ep patìh bùa A-si-ri.

⁶ Chang gùm jah mùt ta phôq wì haq, raliang đac calêh 'mang wì haq, lŏn dìq wì haq taiq trong hatình ngan dù da wì haq.

⁷ Joq 'nàng jàn Au dì dèh manoh cađac Au. Wì creo Au Yi Ha'nhèq, mahaq wì haq ùh padèch iu tiaq Au.

⁸ “Ô Ep-ra-im, broq 'màng leq Au ma jah cađac ìh? Ô Is-ra-ên, 'màng leq Au jah cađac ìh? Broq 'màng leq Au jah ta broq ca ìh troi Atma loq troi Xê-bô-im? Manoh Au mango dìq jaq; manoh xa-ŏch da Au tìah ca ùnh cheo dêh.

⁹ Au padràng dèh can nòih, ùh jêh Ep-ra-im hòm. Ma jah 'màng aih Au Boc Plình, ùh xài con mangai; Au Yiang Hadròih ŏi ta'ne ìh, ùh yŏc can nòih lam trùh ta ìh.

¹⁰ Wì haq tiaq atìq ca Chuaq, Haq grenh tìah ca baco hlari; joq 'nàng jò Haq grenh; 'bài con caiq Haq enh mahì mùt tarìt tariang lam trùh.

¹¹ Wì haq tarìt tariang trùh enh Aicàp tìah ca chìm pan, enh taneh A-si-ri tìah ca chìm trù; Au broq ca wì haq hlài ŏi dèh ta hnem cla,” Chuaq doi 'màng aih.

¹² Ep-ra-im capoch bàu amòng ŏi dudan ca Au wa Is-ra-ên capoch bàu 'nùt; Juđa hadai broq bìac ùh troq tajraq hlài ca Au, aih tajraq hlài ca Boc Plình Hadròih ma wèq dèh manoh.