Mica 5 - Sech Hadròih

Bùa Xa-ông Loh Ta Phôq 'Bêt-lê-hem

¹ 'Màng aih, ô lù lình cadrì, manàiq pì gop ca dabau beq! Wì khoi dan tap ca bèn. Wì yŏc long blai tabŏc 'bài mangai wèq cwìang da Is-ra-ên.

² “Ô 'Bêt-lê-hem Ep-ra-ta, gùng Juđa, joq 'nàng ìh 'yoh dìq jaq ŏi ta 'bài phôq càn ta gùng Juđa, 'nhac 'màng aih, enh nòi ìh jah loh mòiq Ngai broq gàu, cla Haq wèq ban jàn Is-ra-ên,”

³ Taiq 'màng aih Haq phùq con jàn da Haq 'bìq padit padiang trùh jò mangai cadrì jìq xa-ông jah xa-ông, wa mangai oh daq ma 'bìq rùp 'nong lam khoi dèh ca Diac jah wìh hlài ti con caiq Is-ra-ên.

⁴ Haq jah yòng cajap đòiq ban dèh 'bài da haq, nhò padren dêh da Chuaq, wa can rahù da hiniq Boc Plình Haq; wì haq jah ŏi catèm, ma jah 'màng aih Haq jah broq càn trùh nòi lùch da crŏng taneh.

⁵ Haq raq can catèm da bèn. Jò mangai A-si-ri trùh ta taneh bèn wa jôiq len đac bèn, èh bèn jah yòng tapèh ngai mangai ban wa rahem ngai mangai cwan da jàn đòiq tajraq hlài ca wì.

⁶ Wì haq yŏc chang wèq cwìang Taneh Diac A-si-ri, wa 'mang taneh Nimrôt; Haq jah dŏih bèn claih ca mangai A-si-ri jò wì tajêh poh mùt ta gùng bèn jôiq đac taneh bèn.

⁷ Èh phàn ma ŏi xrong hlài da Jacôp ŏi ta'ne da bàc jàn, jah tìah diac ngom trùh enh Chuaq, tìah ca mè 'yoh pêh ta nhat ma ùh i cabô jah padràng loq tàt khech.

⁸ Phàn ŏi xrong hlài da Jacôp hadai jah ŏi ta'ne bàc Diac 'noiq wa ŏi ta'ne bàc jàn, tìah ca baco hlari ŏi ta'ne 'bài ngè rôm, wa tìah ca baco hadròng ŏi ta'ne calùh trìu; jò haq lam cwa, èh jôiq len wa cap hich, ùh i ca cabô jah lam dŏih.

⁹ Tì pì jah dèch enh 'nhèq ca mangai ma tajraq hlài ca pì, wa 'bài mangai ma tagit ca pì èh 'bìq cachìt!

¹⁰ Chuaq doi: “Ta hì aih, “Au jêh đac axêh pì wa raliang đac dìq xê axêh tajêh da pì.

¹¹ Au raliang đac dìq 'bài phôq ta taneh pì wa raliang đac 'bài đôn 'bài lì da pì.

¹² Au jêh đac pajàu ngan tì ta pì, pì pi i ca 'bài mangai ngan tì hòm.

¹³ Au bùiq đac 'bài dua 'mù wa jrang dua 'mù khoi enh pì; pì pi cùh waiq dèh bìac tì pì broq loh hòm.

¹⁴ Au tràm đac 'mù A-sê-ra khoi enh pì wa jêh đac 'bài phôq da pì.

¹⁵ Au ca'naih hlài bìac baxa xam manoh nòih xrong ca 'bài Diac leq ùh tamàng wa loq dì bàu Au.”