'Bŏi Calêu Plình 11 - Sech Hadròih

Chuaq Nòi Hanình

Đawit Achìh

¹ Au hanình dađeh ŏi ta Chuaq. Gleq pì ma doi yôt ca au: “Pan mot beq tìah ca chìm pan hlài dèh ta bôi wang.

² Ma jah 'màng aih cô, mangai dù enh nòi clam khoi 'nat panenh đòiq penh mangai lem jang.

³ Tàng 'bài tanam xèm khoi 'bìq raliang, èh mangai ta-atoq jah broq cleq?”

⁴ Chuaq, Haq ŏi ta hnem hadròih da Haq; gèq bùa da Chuaq ŏi ta Plình; mat Haq hloi hloi ngan hnoq dìq dŏng; mat Haq ngan thù con mangai.

⁵ Chuaq bàt thù mangai ta-atoq, mahaq git ca mangai dù broq xòt ngang.

⁶ Haq ùc 'noh ngia ùnh khàng wa dahwèq ngèq tôq ca mangai dù, cayeo tôq padŏc aih bìac wì haq ep nhàn.

⁷ Ma jah 'màng aih Chuaq aih ta-atoq. Haq loq waq trong ta-atoq; mangai lem jang jah hnoq hadrò Haq.