Amôt 3 - Sech Hadròih

Dìq Ca Xinoi Pòq Tôiq Lôi

¹ Ô con caiq Is-ra-ên, tamàng bàu cô beq, cô bàu Chuaq capoch tajraq hlài ca pì, aih tajraq hlài dìq dŏng ca hadròng hadrech Au ma 'nong loh khoi enh Aicàp.

² “Au khoi ràih toq pì ta rìm hadròng hadrech ta crŏng taneh; 'màng aih Au trùh baxa pì taiq rìm bìac ngang dù pì.”

³ Tàng baiq ngai ùh hatroq ca dabau, èh jah lam pajùm ti dabau 'mòh?

⁴ I baco hlari leq ma grenh tàng haq 'nhòq rùp jah hanùm 'mòh? Baco hlari radam leq loq grenh ŏi ta còp tàng 'nhòq rùp jah cleq 'mòh?

⁵ Chìm ùh 'bìq rùp ta hlàm tàng ùh i ca hanùm ta hlàm. Tàng ùh hlech cleq, èh hlàm i đêh tŏc enh taneh ùh?

⁶ Tàng i ken hlôi ta phôq, jàn ùh crè 'mòh? I ca bìac ranàc leq trùh ta phôq tàng Chuaq ùh broq loh 'mòh?

⁷ Joq 'nàng Chuaq Boc Plình ùh broq mòiq bìac hlèp leq ma ùh pa'noh dèh ca 'bài hapŏng Haq, aih 'bài mangai capoch thai Boc Plình.

⁸ Jò baco hlari khoi grenh, cabô ma ùh crè? Jò Chuaq Boc Plình khoi doi, cabô ma ùh enh capoch hlài bàu doi da Haq?

⁹ Anoi 'noh ta 'bài đôn hanình Achđôt wa ta 'bài đôn hanình da Aicàp beq, doi: “Pì tagop ŏi ta 'bài bôi wang da Sa-ma-ri; ngan bìac manhài càn ta aih, wa bìac padit padiang ta jàn haq beq.”

¹⁰ Chuaq doi: “Wì haq ùh broq bìac lem jang; wì haq tablah yŏc cùng hang 'mùt dèh ta hnem.”

¹¹ Taiq 'màng aih Chuaq Boc Plình doi: “Mangai tagit ca pì jah trùh dudan ca taneh pì; bahnhung đac padren pì, wa raliang đac 'bài đôn hanình pì.”

¹² Bàu Chuaq doi: “Tìah ca mangai ban trìu toq dŏih jah baiq toq jènh loq mòiq toq don trìu khoi enh hacùng baco hlari, èh con caiq Is-ra-ên hadai 'màng aih, wì mangai ma rìh ŏi ta Sa-ma-ri wa ta Đamat hadai jah dèch claih toq 'biaq.”

¹³ Chuaq Boc plình i cwìang itai, doi: “Tamàng wa anoi pariaq bìac cô ca hnem Jacôp beq.”

¹⁴ “Ta hì Au baxa Is-ra-ên taiq tôiq lôi haq, Au hadai raliang đac 'bài ca'bŏng tadreo da Bêtên; 'bài aki da ca'bŏng tadreo 'bìq coh ca'nìh clìh đac ti ha'neq.

¹⁵ Jò aih Au raliang đac hnem ralìm wa hnem padrang; 'bài hnem càn caiq broq xam bla rŏih jah raliang wa 'bài hnem càn jah hnhung đac.” Chuaq doi 'màng aih.