ZEFANIA 2 - PATHIAN LEKHABU IRTHIANG C.L. Bible (BSI)

Irlet hranga ngênna

^1-2 O nam inzakna lam inhre loihaio, Thu’nkung a zuang suak mân le nikhua kha favâi anga a hek mân, ki Rengpa ninginmurnaa ichiom tak kha nin chunga a zuang tung mân le, Rengpa ninginmurna nikhua kha nin chunga a zuang tung mân hin, Intân khôm roi, a ni, intân khôm mur mur roi.

³ Nangni irnênga mi thuhnuairôl murdi, a thu zômtuhaio, Rengpa kha zong roi; Felna zong unglân, thuhnuairôl tum roi: Rengpa ninginmurna nikhuaa khan ithupin nin om thei itinin.

Israel ram vêla nam dang siat hrang thu

⁴ Gaza khua kha rotsanin om a ta, Askelon khua kha inrampaiin a iom hrang a ni: Sûn laia Asdod khua inhnotsuak an ta, Ekron khua kha khom suakin om a ti:

⁵ Tuipui kama om Keret namhai kha an chung a rik e! O Kanaan, Filistia mihai ram, Rengpa thu kha ni chunga a zuang itung a ni; Luatu omloi rakin nang inboipai ki ti.

⁶ Khan, Tuipui kamhai kha sûl hring hmun ni a ta, Belrapuhai irbukna siamna le belrahai zahual ni a ti.

⁷ Khanchu, tuipui kam kha Juda sûnghaia la omsunhai ta hrang ni a ta; kha khan an belra rualhai kha tâk an ta, khohloi tiang chu Askelon khua inhaia riak an ti; Rengpa an Pathian khan hong hro a ta, An sal intângna kha irletpai a ti.

⁸ Moab mihai hrilsiatna le Amon nâihai khêk khumna, ki mihai an hrilsiatna le an ramria an roiinpuina kha kin hriat tâka.

⁹ Khanchu, a nuna kin nun sûng chu, Moab kha Sodom ang ni a ta, Amon nâihai kha Gomora ang ni ngêt ngêt an ta, an ram kha hloisûla sip, michi khur le kumkhua lualoi ang ni a ti: Ki mi la’rkholhai khan anni kha râllâk an ta, ki nam la omsunhai khan lua an ta, tih hi Sipaihai Rengpa, Israelhai Pathian thu suak a ni.

¹⁰ Sipaihai Rengpa mihai chunga khan anni kha lian irtiin, anni kha an lei hrilsiat tâk sikin, hi thil hi an lârirpâkpuina hrangin an ihmu a ni.

¹¹ An chunga khan Rengpa kha ichiom tak ni a ta; irnêng chunga pathianhai murdi kha a inboipai hrang a nia; kha khan mihriamhai khan ama kha biak ta an ta, mi tinin mâni hmun seng ata chubai mûk an ti.

¹² Nangni Ethiopia mihai khom ki khandaia thatin om nin ti.

¹³ Khan, hmâr tiang ram chunga a kut irlek a ta, Assuria ram inboipai a ta, Ninevi khua chînsan a ta, ramchâr angin inchârtir a ti.

¹⁴ Khan, a sûnga khan sa chi tinrêng, ramsahai murdi riak an ti: Simbu le sarkuhai khom a khopui laia khan riak an ta, an hnukirhâi kha tukver ata inhriat ni a ta: Sidar thinga siamhai khom an rongtirpai tâka.

¹⁵ Hi hi khopui raifân thei tak, mâni ir-iam zoi thei tak, a lungrîla keima hi ki ni, ki chunga tûte om mahai, irti lungrîl kha a ni: Sahai riakna hmun hrangin, a ramin a’rkhêl bâk tâka na! A hong khêl murdi’n an dang inchek khum an ta, an kut irlek khum an ti.