ZAKARIA 8 - PATHIAN LEKHABU IRTHIANG C.L. Bible (BSI)

Rengpa’n Jerusalem indingthar nôk hrangin chong an kung

¹ Khan Sipaihai Rengpa’n Zakaria kuang hi thu hi an hriattir nôka:

² “A mipuihai ki lunginkhamna, an râlhai chunga ki ningmurna ten insum thei lungkhamna sika khan Jerusalem chu san ki nuama.

³ Ki khopui irthiang Jerusalem khan kîr nôk ki ta, khataka khan om ki ti. Khopui iamom tih ni a ta, Sipaihai Rengpa tâng chu tâng irthiang iti ni a ti.

⁴ Khanchu Jerusalem kotsuahai khan pitar le putarhai, khianghrol leh kalchôihai chu la lêng nôk an ti.

⁵ Khan a khopui kotsuahaia khan pasaltehai le nupangtehai chu la’rdâi nôk an ti.

⁶ “Hi thil hi atûna nam omsunhai ta hranga hin chu thil tho theiloi angin inlang a ta, khannisian keima ta hrangin chu tho thei loi ni no ni.

⁷ Ki mihai chu an ihruaihaina ram ata kha saninzôkhai ki ta,

⁸ Jerusalema om hrangin nisua tiang le nitâk tiang ata la hong hruaihai ki ti. Anni chu ki mihai ni an ta, kei chu an Pathian iamom tak le diktaka an chunga roirêltu ni ki ti.

⁹ “Ngam takin om roi! Ki tempil indingthar nôk hranga lungphûm phûma a om laia deipuhaiin thu an lei ihrilhai kha atûn khom kha thuhai dên kha nin inhriat nôka.

¹⁰ Kha nikhuahai khan chu mihriam ta hrangin irhlofâkna hrang hi om maka, sâ ta hrang khomin irhlofâkna hrang rêng rêng hi om mah; mi tin chu mâni tualbôm seng doiin kin omtirhaia.

¹¹ Khannisian atûn chu, hi irchi la omsunhai hi chu kha nikhuaa ki ilohai ang khan chu lôhai ta no ning.

¹² Lungthi takin an loimânhai tho an ta, an grep kunghaiin ra tamtak insua a ta, irnêngin bu le bâl insua a ta, rotui khom tamtak om sa a ti. Hi satvurna murdihai hi ki nama mi la omsunhai chunga intungtir ki ti.

¹³ O Juda le Israel mihai, tiana khan chu ram dang mihaiin, ‘Israel le Juda chunga siatna a itung ang hi ni chunga khom tung ri se’ tiin khomâk an irsâm ngaia. Khannisian nang saninzôk ki ta, ram dang mihaiin, ‘Israel le Juda chunga satvurna a itung ang hi ni chunga khom tung ri se,’ tiin la hril an ti. Khasikin ngam takin omin lân, chi no ro,” a tia.

¹⁴ Khan Sipaihai Rengpa’n hiang hin a hrila, “Nin irchibulhaiin ki ning an inmurtir lai khan, an siatna hrang ki ngaituaa, ki milung chu thûl loiin, ki thiltumhai chu kin tungtir tâka.

¹⁵ Khannisian atûn chu Jerusalem le Juda mihai chu satvur hrangin ki ngaitua tâka, khasikin chi viat no roi.

¹⁶ Hi thilhai hi nin itho tum hrang chu a ni: Thudik irhril unglân, roirêlna hmuna khom irngeina intungtir thei ngai, thudik chu târinlang roi.

¹⁷ Mi siatna hrang ngaitua no unglân, khomâkirsâmin minlak tho no roi. Minlak le roirêlna dikloi le thisen insuana hi ki theimâk a ni,” tiin.

¹⁸ Khan Sipaihai Rengpa’n hi thu hi Zakaria kuang a hrila:

¹⁹ “Juda mihai ta hrangin tha minlinaa le, tha ringanaa le, tha sarinaa le tha sômnaa bungheina hi lômna le râifânna kût ni a ta, khasikin dikna le irngeina hi irngaiinnat roi,” tiin.

²⁰ Khan Sipaihai Rengpa’n, “Khopui tamtakhai rengata Jerusalema mihai zuangna hrang zoro chu anai ta.

²¹ Khopui inkhatin khopui danga mihai kuang, ‘Sipaihai Rengpa chu biak hrangin le a satvurna chu zong hrangin kin ife a ni hi, nangni khom kin kuang hong sa roi’ la ti an ti, a tia.

²² Mi tamtakhai le nam sinthothei takhai chu Sipaihai Rengpa biak hrangin le a satvurna zong hrangin Jerusalema la zuang an ti.

²³ Kha nikhuahaia khan chu ram dang mi sômkhat chu Juda mi inkhat kuang zuangin, ‘Pathian chu nin kuang a om ti kin inhriat sikin, keini khomin nangni zui kin ti’ tiin la hril an ti, a tia.