ZAKARIA 7 - PATHIAN LEKHABU IRTHIANG C.L. Bible (BSI)

Bunghei dân dik loi Rengpa’n a dem

¹ Khan Daria an lal kum minlina, a tha kuakna (Kisleu tha) a sûn minlinaa khan Rengpa’n ki kuang thu a zuang hrila.

² Kha zoro lai khan Bethel mihaiin Sarezera hai, Regenmeleka hai, an mihai leh Rengpa satvurna zong hrangin le,

³ Sipaihai Rengpa, ochai kuanga le deipuhai kuang khan, “Kha dôr ten kum sûnga kin lei itho ngai ang khan, tempil siatna sika tha ringanaa bu kin inghei ngai hi kin la itho mai hrang ma ni?” tiin an irdonhaia.

⁴ Khan hi hi Rengpa rengata ki kuanga thu zuang tung chu a ni.

⁵ “Hi rama mipuihai le ochaihai kuang hin hiang hin hril ro, kum sômsari sûng tha ringana le tha sarina bu an inghei hi keima ta hranga an inghei ni mah.

⁶ An fâkin an nêk khomin, kha kha chu an ta hranga an ifâk le an inêk kêng a ini” ti hi.

⁷ Khan, hi hi matona Jerusalem chu tuanintung taka a oma, mipui tamtak a sip laia le, a khopuihai ti bana, sim tiang le nitâk tiang tâng kôlhaia an om laia deipuhai kuanga Rengpa’n a lei ihril kha a ni.

Thuzômloina sika sal intângna

⁸ Khan Rengpa’n hi thu hi Zakaria kuang a hrila:

⁹ “Matona ki mihai chu hiang hin thu ki pêkhaia: roirêlna dik chu inlangtir unglân, khonzâna le inrenna khom inlangtir sa roi.

¹⁰ Nin ram sûnga ram dang mihai, meithâihai, farahai le inrianginvâihai chu nuam le ningin lohai no unglân, khabana mâni urênghai chunga tukhomin sinsiat ngaitua no ri sehai,” tiin.

¹¹ Khannisian mihaiin chu an tukullian insua’n, irngai nuam loiin an oma; an milunghai khâr khapin,

¹² lung angin an inngartira. Matona deipuhai hmanga ki thuhrilhai kha an irngai no sikin, a sân an chunga ki ning an mur tâka.

¹³ Thu ki hril lai khan an irngai no sikin, kei khoma an thuhril chu irngai pehai ma ung.

¹⁴ Kêllaiher angin, ram danga om hrangin ki phît infâihai zit tâka. Hi ram satak hi masanin khoram inchangtirin, mi inkhat lua a sûnga om loiin an siam tâk a ni.