ZAKARIA 6 - PATHIAN LEKHABU IRTHIANG C.L. Bible (BSI)

Inlârnaa sakor tâli minli hmu thu

¹ Khanchu inlârna ki hmu nôka, sumsen tâng inhni kâr ata hi sakor tâli minli hong suak hi ki hmua.

² Tâli inkhatna chu sakor senhaiin an kaia, inhnina chu sakor dukhaiin an kaia,

³ inthumna chu sakor ngoihaiin an kai, khan a minlina chu sakor rânghaiin an kaia.

⁴ Khanchu vântirtôn kuang khan, “Ka pu, hi sakor tâlihai hin imo a inentir?” tiin ki’rdona.

⁵ Khan ama khan, “Hihai hi irvâna irtha minlihai chu an ni, irnêng pumpui Rengpa makung ata zuang suak an ni,” tiin a ni sâma.

⁶ Khan, tâli sakor dukhaiin an ikai kha Babulon ram hmâr tiang an fea, khan sakor ngoihai kha nitâk tiang an fea, sakor rânghai kha chu sim tiang an pana.

⁷ Khan sakor rânghai kha an hong suak tena chu, irnêng chu eninfel hrangin nghâkhmo takin an oma. Khan vântirtônin, “Fe unglân, irnêng chu eninfel roi,” tiin a hrilhaia; khanchu an fea, a iti lam ang takin an tho tâka.

⁸ Khan vântirtôn chu khêkin ki kuang, “Babulon hmâr tianga sakor fetuhai khan Rengpa ningmurna chu an indâipai ta,” a tia.

Josua rênglukhum inkhumtir thu

⁹ Khan Rengpa’n hi thu hi a ni pêka.

¹⁰ Ki kuang, “Sal intâng mi Heldaia hai, Tobija hai le Jedaia haiin thilpêk an ipêkhai kha lan lân, Zefania nâipa Josia ina inrang takin fe roh. Hi mi murdihai hi Babulon sal intângna rengata hong kîr nôkhai chu an ni.

¹¹ Khan sumtak le rângachak an thilpêkhai ata kha rênglukhum kha siamin lân, ochai uliantak Jehozadaka nâipa Josua inkhumtir roh.

¹² Khan Sipaihai Rengpa’n hiang hin a hril tiin ama chu hril ro, ‘Khan ar hming ôn an iti kha, ama chu tuanintung takin la om a ta, Rengpa biakbuk chu lan ding thar nôk a ti.

¹³ Ama ngei chu kha biakbuk sintu kha la ni a ta, rêngin a idong ngai mânlianna chu la dong a ta, a mihai chunga roi la rêl a ti. A rêngtoihmun kôla ochai chu ngîr a ta, ama leh irngei tak le irrual takin sin thosuam an ti’ tiin.

¹⁴ Renglukhum chu Rengpa tempila, Helema hai, Tobija hai, Jedaia hai, Zefania nâipa Josia hai inhriat maina hrang ni a ti.

¹⁵ Khan Rengpa tempil chu hmun hlataka mihai chu hongin sinpuihai an ti. Khan indingtharin a om nôk tena chu, Sipaihai Rengpa’n nin kuanga a ni zuang itîr a nih ti inhre ta nin ti. Hi thil hi Rengpa nin Pathian thupêkhai chu nin zôm vinga ni’n chu, la tung a ti.