ZAKARIA 2 - PATHIAN LEKHABU IRTHIANG C.L. Bible (BSI)

Irkhîna hrui chôi

¹ Khan, ki mit ki hong inlêngtira, ki hong ena, mi inkhat a kuta irkhîna chôi hi ki hmua,

² khanchu, keima’n chu, “Khôn mo ni ife hrang?” ki tia. Ama khan ki kuang, “Jerusalem hi a khang i dôr mo a ni, a dung i dôr ten mo a ini inhre hranga irkhî hrangin,” a tia.

³ Khan, irngai ta, vântirtôn ni biaktu kha a fe suak ta; khan, vântirtôn dang ama tong hrangin a hong suak saa,

⁴ a kuang, “Intânin lân, hi ruatharte kuang hin, “Jerusalem hi a mi tam sik le sapâl tam sikin khua inhrukna nei loi anga luan a iom hrang a ni.

⁵ kei hi a vêla mei kul ni ki ta, a laia roiinpui kha ki ini sa hrang a nia,” ti hi Rengpa thu suak a ni.

Sal intânghai kîr nôk hranga ti

⁶ Hong roi, hong roi, hmâr ram ata intân suak roi, ti hi Rengpa thu suak a ni. Irvân phâivua ang dênin kin darhtir tâka, ti hi Rengpa thu suak a ni.

⁷ Hong ta roi, Zion, Babulon nâinu kuanga la om, relpat roh.

⁸ Sipaihai Rengpa khan hiang hin a tia: roiinpuina hrang angzia zêlin nangni an siattu nam kuanga khan a ni tîr a ni: Nangni tôntu’n chu a mit lailên a itôn a ni.

⁹ Irngai roi, ki kut ki inthik khum hrang a nia, anni sinthotuhai râllâk ni mai an ti: khanchu, sipaihai Rengpa khan a ni tîr a nih ti nin la inhriat hrang a ni.

¹⁰ Zion nâinu, raiinfânin zâi ro, irngai ro, ki zuang e, ni kuang ki ilêng hrang a nia, ti hi Rengpa thu suak a ni.

¹¹ Kha nikhuaa khan nam tamtakin Rengpa kha hong zom an ta, ki mihai ni an ti: khan, ni kuanga khan lêng ki ta, khanchu, sipaihai Rengpa khan ni kuang a ni itîr a nih ti nin hriat tâk nin ti.

¹² Khan, Rengpa khan ram irthianga a dongtum hrangin Juda kha lua a ta, Jerusalem kha lan thang a ti.

¹³ Mi murdihaio, Rengpa makunga khan dâichit roi: Ama kha a hmun irthiang ata a hong thoi tâka, tiin va hril ro, a tia.