ZAKARIA 13 - PATHIAN LEKHABU IRTHIANG C.L. Bible (BSI)

Jerusalem le a kôlvêla namhai

¹ Khan Sipaihai Rengpa’n, “Kha zoro kha a hong tung tena chu, Davida irchi suanpâra mihai le Jerusalema mihai, an sualnahai le an millim biaknahai thâr irthiangna hrangin tuikuang inhong pe ni an ti.

² Kha tena chu keiin hi ram sûng ata hi millimhai irhming chu inboipai ta ki ta, tukhomin anni chu inhre mai ta no nihai. Deipua irtipu kai chu sâtthâkhai ki ta, millim biak nuamnahai chu lapai pehai ta ki ti.

³ Khannisian mi’n thu a la hril nôk maia niin chu, ama nu le pa ngeiin ama chu that nih a ti, tiin hril ri se; minlak thoa, Rengpa thu hrila a’rti sikin. Khan thu a hril nôk laiin ama chu a nu le a pa ngeiin sun that ri sehai.

⁴ Kha zoro kha a hong tung tena chu, deipu tukhomin inlârna a ihmuhai sika khan lârirpâk ta no nia, deipu ang khomin om ta no nia, mipuihai huangna hrangin deipu silkaihai irbel ta no nihai.

⁵ ‘Kei chu deipu ni ma ung, loi sinthopu kêng ki ini; ki hring sûng hin loi kêng ki itho ngai,’ la ti an ti.

⁶ Khanchu mi’n ama chu, ‘Ni rôpa sâbehai kha imo a ini?’ tiin irdon an ta; khan ama’n, ‘Hihai hi ki rualhai ina an ni inphop a ni,’ tiin sâm a ta,” a tia.

Pathian belrapu that hrang thupêk

⁷ Khan Sipaihai Rengpa’n hiang hin a hrila, “O khandai, harin lân, keima ta hrang sinthotu belrapu kha that roh. Ama chu thatin lân, belrahai chu irthekindarh an ti.

⁸ Ki mihai chu doihai ki ta, khanchu ram sûng murdia mipuihai chu hmun thuma sena hmun hni chu thi an ti.

⁹ Khanchu a hmun thuma chu meia infetir ki ta, sumtak chu irthiangtira a iom angin irthiangtir ki ta, rângachak chu fia a ini angin fia ki ti, khanchu ki kuang chongchai an ta, keiin anni chu sâmhai ki ti. Anni chu ki mihai an nih ti hrilhai ki ta, khan anni khomin, ‘Rengpa chu kin Pathian a ni,’ ni ti ta an ti,” a tia.