ZAKARIA 11 - PATHIAN LEKHABU IRTHIANG C.L. Bible (BSI)

Mi nunsia tûkna

¹ O Lebanon, ni mikothai inhong ro, ni sidar thinghai chu meiin a kângpai theina hrangin!

² O meisâr thingkunghai, sidar kunghai chu an tûk tâk sikin chap le inrûmin om ro; kha thing roiinpui takhai kha insiatpaiin an om tâk sikin.

³ Roirêltuhai chu lungzîngin an khêk ta, an roiinpuina chu ar hmang tâk sikin. Kâmkeibaknei inrûm irhâihai chu irngai roi. Jordan dung irhôra an omna rampui chu insiat a ni tâk sikin.

Belrapu inhnihai

⁴ Rengpa ki Pathianin ki kuang hiang hin a hrila, “That hranga om belra pâlhai hi donsuihai roh.

⁵ A’rchôktuhaiin an thathaia chu, hremin om mahai, a zuartuhai lakin, ‘Rengpa chu inpâkin om ri se, ei irchong tâk sikin’ an tia. An belrapuhai ten lua’n an chunga inrenna nei mahai,” a tia.

⁶ (Khan Rengpa’n hiang hin a hrila, “Irnêng chunga mihai khu inkhat lua inrenhai ta no ning. Mi tin chu an roirêltuhai kuta pehai ki ta, kha roirêltuhai khan irnêng khu lan ram an ta; khanchu keiin anni chu an kut ata saninzôkhai no ning,” a tia).

⁷ Belra zuartuhai le a’rchôktuhai khan kei chu irhlo hrangin an ni hmanga, belra that hranga omhai belrapu chu ki hong chang tâka. Khanchu khianghrol inhni ki lâka, inkhat kha “Ditsakna” ki tia, inkhat dang kha “Irpumkhatna” tiin ki phuaa, khaang khan belra pâlhai chu ki donsui tâka.

⁸ Khanchu belrapu inthum, a ni hmumâkpu’n chu irngaitheihai ma unga, khasikin tha khat sûngin anni chu ki paithâkhai tâka.

⁹ Khanchu keiin belra pâlhai kuang khan, “Nin belrapu’n om ta no ninga, a thi hranghai chu thi ta unglân, inboipaia om hranghai chu inboipaiin om ta roi. A hring sunhai khom chu anni le anni hmê chu la’rfa an ti,” tiin ki hrila.

¹⁰ Khanchu khianghrol “Ditsakna” ti chu ki lâka, kin khiakpaia, Rengpa’n nam tinhai le thuthung a isiam kha sûta a om theina hrangin.

¹¹ Khasikin thuthung chu kha nî khan sûtin a om tâka, belra irchôktuhai le zuartuhai khan kei chu an ni en maia, khan Rengpa chu ki sinthohai ata kha a zuang chong a nih ti an inhriat tâka.

¹² Khan keiin an kuang, “Nin nuama ni’n chu, ki hlo chu ni pe roi. Khannisian nin nuam noa ni’n chu ni pe no roi,” ki tia. Khanchu tangka sômthum chu ki hlo’n an ni pêk tâka.

¹³ Khan Rengpa’n ki kuang hiang hin a hrila, “Tempila tangka siana hmuna khan se roh,” a tia. Khanchu tangka sômthum, ki man hranga ruk bak ni le irhoia an ingaitua kha tempil tangka siana hmuna khan ki sia tâka.

¹⁴ Khanchu khianghrol dang, “Irpumkhatna” iti kha kin khiakpai nôka, Juda le Israel irpumkhatna chu insiatpaiin a om tâka.

¹⁵ Khan Rengpa’n ki kuang hiang hin a hrila, “Atûn chu belrapu pualoi tak angin om roh.

¹⁶ Ki belrahai donsui hrangin belrapu ki siaa, khannisian belra siat hranga omhai chu changpuihai maka; ar hmanghai khom zong maka, a pop a liamhai khom indamhai maka, a hring sunhai khom infâhai mah. Belrahai laia a marhai hme kha kêng a fâka, an ke mitinhai chu a kaithêr pehai ngai.

¹⁷ Kha belrapu hmanghmunboi chung kha a rik e! A belra pâlhai chu a mâksanhaia. Irdoina’n a sinthotheina chu inboipai ving a ta, a bân chu zeng a ta, a chang tiang mit chu chô a ti,” a tia.