THUVÂRHAI 9 - PATHIAN LEKHABU IRTHIANG C.L. Bible (BSI)

Vârna le intona

¹ Vârna khan in a sina, a chopui sari a phuna.

² Hruaithena hrangin a thil hringhai a thata, uain a pola, khalâi an irfûka.

³ A tirtôn dôngmatehai a tîra, khopui hmun irsângna taka khêka:

⁴ “Tho hong roi, inmôlhai!” ti hrangin. Khante, intohai kuanga khan,

⁵ “Tho hongin lân, ki bai hong fa’n lân, ki uain irpol hong in roh.

⁶ Nin môlna kha masanin lân, hring ro. Khante, inhriatna lampui kha zui ro,” tiin.

⁷ Hmusit ngai mi ni hrilin chu nang phengsan a ta, mi pualoi ni ngo’n chu kuttum tuangna ni ti.

⁸ Khasikin, mi hmusit ngai mi hril no ro; nang hmumâk a ti. Khannisianlân, mi vâr ni hrilin chu mahrip nang tho a ti.

⁹ Mi vâr kuanga ni thu’nsîr murdi khan invârtir ual a ta; mi fel kuanga ni thuhril murdi khan an hriatna irbôktir pe a ti.

¹⁰ Rengpa chi hi inhriatna bul a ni. Mi irthiang inhriat hi inhriat thiamna dik a ni.

¹¹ Vârna’n ni hring sûng kum irbôktir a ti.

¹² Ni vârin chu nangma inlâp ni ta, khan vârna ni hnôlin chu nangma vai tuang ni ti.

¹³ Intona chu nupang zakboi, a om pai pai ang kha a ni.

¹⁴ A mikot bula a toi ngaia, khua hmun irsânghaia a toia;

¹⁵ mâni sintum chit ngaituaa theng irlôi murdihai a lei koia:

¹⁶ Mi’nmôlhai, hi tiang hong roi!” tiin.

¹⁷ Khan, inhriatna nei loi mihai kuang khan, “Inrûk tui chu a thum uala, inrûk bai khom ar hnik ual,” a tia.

¹⁸ Khannisianlân, anni khan khanu ina fe kai chu an thia, a lei lût tâk kai chu thina ram rîla an om ngai ti inhre viat mah.