THUVÂRHAI 8 - PATHIAN LEKHABU IRTHIANG C.L. Bible (BSI)

Vârna inpâk

¹ Irngai ro! Vârna chu a kheka, inhriat thiamna khan ar hâi a insua mo ni ma?

² Lamlian kôla tâng irsânghaia le lamsuamhaia khan a ngîra.

³ Khopui dâimitzîng haia, kho lûtna mikot suahaia inring takin a khêka:

⁴ O nangni mihriamhaio, nangni ki ngên; irnênga mi tinrênghai ki ikoihai a ni.

⁵ Mi’nmôlhai, vârna irchû unglân, intôhai, inhriatna irchû roi.

⁶ Ki chong satak takhai hi irngai roi; ki thuhril murdihai hi chu a idik a ni.

⁷ Ki bâia thu suak hi thutak a nia; milak thu chu keima hrangin khôkmâk om tak a ni.

⁸ Ki bâia thu tinrêng suak hi a idik zit a ni; thu dik loi le chanlamboi thu ite om mah.

⁹ Inhriat thiamna nei mi hrangin chu a fia zita; inhriatna nei hrangin chu an tâiteng a ni.

¹⁰ Tangka sum nêkin ki’rchutirna hi inthang unglân; rângachak hlu tak nêkin inhriatna hi inthang roi.

¹¹ Lunghluhai nêkin vârna chu a sa ual; thil ni indit murdi leh hrilkhî thei zât om mah.

¹² Kei hi vârna chu ki nia, vârna hin omhmun ki khuara, inhriatna le irngaitheina ki hmu suaka.

¹³ Rengpa chi chu sual hnôlpai hi a ni; irpâkna hai, irsongna hai, sual lampui hai le chong chanlamboi hai hi ki ihnôlpai a ni.

¹⁴ Thil hi ki ngaituaa, ki ngaitua suak ngai. Inhriat thiamna ki neia, hrât tak chu ki ni.

¹⁵ Renghaiin roi an rêlna hrangin le hruaituhai dân sa an siam theina hrangin ki changpuihai ngai.

¹⁶ Keima hmangin hruaituhai murdi’n irnêng chunga roi an rêla, mi lian le mi roiinpuihai khomin.

¹⁷ Lung ni thunghai ka chu lung ki thunga; Takirtâi taka ni zongtuhai khan ni hmu thei an ti.

¹⁸ Pêk hrang irchon le roiinpuina chu ki nei, irhniangna le thangsuana hai khom.

¹⁹ Ki kuang ata nin ihmu chu rângachak satak nêkin a sa uala, sumtak irthît infâi liai nêk khomin a sa ual.

²⁰ Felna lampui ki hroa, Dikna lampuihai ki zuia,

²¹ lung ni thunghai chu irchon ki pêkhaia, an inhai chu irchon, sumpuanin kin sip ngai.

²² “Rengpa khan thilsiam bul takin a ni neia, tianlaia a thilsiam bul tak chu.

²³ Kumtuang ata siam ki nia, irnêng irsiang mân ngeia khan.

²⁴ Tuikhanglian la om mân le tuidunghai la om mâna khan ki suak ta.

²⁵ Tânghai la om mân le mualhai la om mân ngeia khan ki suak tâka,

²⁶ Pathianin irnêng le ramri a siam mân daiha, nêngpil a om mân daiha khan.

²⁷ Irvânhai a siam laia khan ki om tâka, Tuipui chunga fe theina a siam laia khan.

²⁸ Sûmhai irvâna a siahai laiin, Tuikhanglian hnâr ar hong laiin le

²⁹ tuipuia tuihai a iti ban irsôn loi hranga ramri a khang pehai laia khan. Irnêng lungphûm a phûm laia khan ki iom tâk a ni.

³⁰ Kha laia khan, kut theithiam mi angin a kôla ki oma, a nitin a lômna ki nia, A kôla raifân takin ki om mai ngai.

³¹ Lêng theina a rammual siama raifân taka omin, ki lômna tak chu mihriam nâihai chunga a ni.

³² “Thoi roi, ruathartehai, ki thu irngai roi, ki thupêk zôm unglân nin râlvân sa a ti.

³³ Irchutirna nin idong kha irngai unglân; vâr unglân hmusit no roi.

³⁴ Mi tukhom ki mikot bula oma, ki dâi mikot bula oma, ki dâi mikot bul nghâka, ki thu irngai chu a râlvân a sa e.

³⁵ A ni hmu kai chu hringna an ihmu a nia, Rengpa inditna khom dong a ti.

³⁶ Khannisianlân, ni hmu loi kai chu mânia dûk irtho ni an ta; tukhom ni hnôl kai chu thina lungthung an ni,” tiin.