THUVÂRHAI 6 - PATHIAN LEKHABU IRTHIANG C.L. Bible (BSI)

Irdîn nangna dang

¹ Ki nâipa, mi dang lâkaihai chunga mophurtu hrangin chong nin kunga,

² ni chong ngeiin nang a khita; ni chonginkung ngeia nin ôkin chu,

³ ki nâipa, kha mi irchamneina hnuaia ni om a nih ti inhre roh. Khannisianlân hiang hin suak hrang dân chu a ni: a kuang fe zôi zelin lân, nang insua hrangin ngên roh.

⁴ Inmusu ta no’n lân, irngam chian ta no roh.

⁵ Sa kâptu kuta irthokin sakhi a intân pe pat ngai angin, châng kamtu kut ata va a ivuang suak pe pat angin suak pat ro.

⁶ Mi thaboihai khan phâivâng kuang fe’n lân, a lampui irchu roh.

⁷ Anni khan rênghai, hruaituhai, roirêltuhai nei mahaia,

⁸ khannisianlân, fûr laiin fâkrua an bukkhôma, sâl tika hrang an lei bûm ngai.

⁹ O mi thaboi, i dôra sôt mo ni izâl chian hrang tâk?

¹⁰ “La hong insîng viat hi rong” a ti ngai.

¹¹ Khannisianlân, a in kârin inriangna khan inru râlthuama irvo angin hong in-ôk a ti.

¹² Mi hmanghmunboi, mi siahai chu milak tho’n an irvâk mai ngai.

¹³ Nang an huang theina hrangin an mit le an chonga, kut an veivâk ngai.

¹⁴ A lungrîla tukullianna a oma, thil sual a ngaitua maia, irngeiloina a tû ngai.

¹⁵ Khasikin, irningloiin siatna’n de thut a ta, anni chu a saterengin popliam an ti.

^16-19 Rengpa’n thil sari hnôl ta taka a ihnôl le a irngai thei viat loi a om: Lârirpâkhai, milak milei hai, mi ningthik sin loi thisen insuana kut hai, thil saloi ngaitua ngai lungrîl hai, sual sin hranga kal inhrâttir ngai ke hai, inhriatpuitu dol milak chungirchuan ngai hai, rual laia buaina siam ngai mi hai.

Uire loi hranga irdînna

²⁰ Ki nâipa, ni pa thupêkhai zômin lân, ni nu nang irchutirna irnghil viat no ro.

²¹ An chonghai irtik maiin lân, ni lungrîla vong roh.

²² An irchutirna khan nin zinnahaia nang hruai a ta, zâna nang enkol a ta, sûna roi nang zêkpui a ti.

²³ An thupêkhai kha vâr irtêk ang kha a nia; an hrilna khan hringna lampui nang irhmutir a ti.

²⁴ Nupang sual ata le mi dang dôngmahai chong thum taka irthokin nang inzôktir a ti.

²⁵ An satnahai chu irzuk no’n lân; an mit meng ir-âi khan nang in-ôktir no ri se.

²⁶ Pasalin, notizuar chu bai tiam khat man khomin ar chôk thei, khannisianlân, uirena’n chu a hringna ten zong a ti.

²⁷ Mi’n a puan kâng loiin mei a ipom thei ma ni?

²⁸ Mi a ke kâng loiin mei ir-al chunga a ife thei ma ni?

²⁹ Khaang khan, mi dang dôngma leh zâl ka chu tukhom tuang loiin suak no ni.

³⁰ Mi’n a phîngchâm sika fâkrua a inrûk chu hmusit ngai ma,

³¹ Khannisianlân, ichelin a omin chu a bâk sari’n a ituam nôk ngêt hrang a nia, a inei murdi a ipêk zit hrang a ni.

³² Mi dôngma irchûpuitu chu inhriatna nei ma. Ama le ama a insiat a nih ti inhre suak ngai mah.

³³ Kuttum tuangin hmâimôkna tong a ta; mualinphoi takin om mai a ti.

³⁴ Hnarsâna hi mihriam ninginmurna a nia; a phuba lâk niin chu ite hôi no ni.

³⁵ Irtannahai hi pom no nia; thilpêk tamtak pe khomin lân, a milung chuk pe ual no ni.