THUVÂRHAI 4 - PATHIAN LEKHABU IRTHIANG C.L. Bible (BSI)

Vârna inlâpzia

¹ Ki nâipasalhai, nin pa nangni irchûtirna chu irngai roi. Nin mikuar sung unglân, inhriat thiamna hong nei nin ti.

² Irchûtirna diktak nangni ki ipêk a ni; khasikin an rêngin vong mai roi.

³ Ka pa ta hranga pasal ki nia, ka nu mithmua chu nâikhât anga indot ki nia,

⁴ ka pa’n a nir chutira, hiang hin a ti ngai, “Ki thuhai hi inhre maiin lân, irnghil viat no ro. Ki thupêkhai angin omin lân, khanchu hring ni ti.

⁵ Vârna le inhriat thiamna nei inlân! Ki thupêkhai irnghilin, uksak loiin om no ro.

⁶ Vârna hnungsongsan no ro, khanchu nang hrung mai a ti; lungthungin lân, nang sûnghual a ti.

⁷ Vârna vai hi thupui taka ni inei hrang a ni. Ni thil nei murdi inchân zit khomin inhriat thiamna nei mai ro.

⁸ Vârna hi lungthung inlân, nang chôiirsâng a ti. Inhlu’n lân, mânlianna nang inchang pe a ti.

⁹ Nangma hrangin roiinpuina rênglukhum ni a ti”.

¹⁰ Ki nâipa, keima tiang ni mikuar sung ro. Ki thupêkhai pomin lân, khanchu ni hring sôt a ti.

¹¹ Vârna nang ki’rchutira, satna tiang nang ki ihruai a ni.

¹² Vâr takin ni fe’n chu ni lampuia ite’n nang khal thei no nia, nin tân khomin tûk no chi ni.

¹³ Ni irchu murdi inhre maiin lân, ni thiamna kha ni hringna a nia, vong mai ro.

¹⁴ Mi sualhai lampuia khan fe no’n lân, mi sualhai nunchan khom zui no ro.

¹⁵ Tho no ro! Siatna ata irkêm ro! Hnung songsanin lân, ni lampuia fe chian ro.

¹⁶ Mi siahai chu siat an sin no zelin chu in thei ngai mahai. Tuhai siatna hrang mani lua an intung pehai no’n chu an in khom mu thei ngai mah.

¹⁷ Siatna le nunrôngna kha an ta hrangin chu bu le anh ang a ni.

¹⁸ Mi felhai lampui chu zîng kôl misa suak, sûn laitak a ni mâka hong vâr tîr tîr ngai ang kha a ni.

¹⁹ Mi siahai lampui rêk chu zân angin a zînga, an tûka, imo an irfûi hrang inhre ngai mahai.

²⁰ Ki nâipa, ki chong irngaiin lân, ki thu’nsîra hin ni mikuar sung ro.

²¹ Ni kuanga irthokin irkiang hrang phal viat no’n lân, ni lungrîla hrê maiin vong mai ro.

²² An hriat thiamhai hrangin hringna a nia, a taksa murdi hrang khomin hrisêlna a ni ngai.

²³ Thil dang nêkin ni lungrîl vêng insa ro; hringna hong suakna kêng a ini.

²⁴ Minlak tho viat no’n lân, chong chanlamboihai hril no ro.

²⁵ Sabeina diktak neipumin mân tiang thîrin lân; mualinphoina tiang irnghat no ro.

²⁶ Ni sin hrang chu satakin ngaitua’n lân, khanchu ni sinna murdi hlochuk a ti.

²⁷ Sualna hnung songsanin lân, intûn takin mân tiang fe ro. Lampui dika irthokin vei tiang mani, chang tiang mani pêt viat no roh.