THUVÂRHAI 30 - PATHIAN LEKHABU IRTHIANG C.L. Bible (BSI)

Agura thuvâr

¹ Jakea nâipa Agura chongchai: Thuvâr chu “Pathian ki kuang om ta ma, Pathian ki kuang om ta ma, Pathian ki kuang om ta ma, changpui innang ki ni”.

² A mihriam laia sa ang kha ki nia; mihriamin inhriat thiamna an inei hi nei ma ung.

³ Vârna lei irchû ma unga, Pathian inhriatna khom ite nei ma ung.

⁴ Tu mo irvâna luia zuang chum nôk tâk? Tu mo a kuta phâivua chel thei? Tu mo puan hlektea tui infûn thei? Tu mo kôlkung murdi indettir? Tu mo a ini? Tu mo a nâipa kha nin hriat mo?

⁵ Rengpa thu chu thudik a nih ti fia a ni tâk. ama zongtu murdihai hrangin ama chu pho a ni.

⁶ A chonghai chu bôk sa no ro, khano’nchu nang hal a ta, milak ni itho inlang a ti.

Thuvâr danghai

⁷ O Pathian, thil inhni nang ki ngên, ki thi mân nin neitir ngêt ro:

⁸ milaknaa irthokin ni sûnghualin lân, irchongna mani inriangna mani ni pe no ro. Ki rukbakin fâk ni pe roh.

⁹ khano’nchu ki nei hraiin nang ki phil itinin. A ninole kin riang hrai khomin mi ta kin rûkin ki Pathian mualphoi ki sak itinin.

¹⁰ Suak kha a pu makunga dem no roh. Khua nang sâl a ta, ni tuang itinin.

¹¹ Mi senkhat an pahai khua sâla an nuhai ngaisak loi an om.

¹² Mi senkhat anni irngaiin irthiang an irtia, an porinche thei dôra porinche an om.

¹³ Mi senkhat anni irngaia sa oka irbe an oma, o, i dôra sa’n mo an irbe tâkna!

¹⁴ Mi senkhat chu an hahai khandai ang le an haphoihai chemte anga ngaih an oma; irnêng ata inrianghai le mihriam lai ata irsamhai invol irhmang hrangin.

¹⁵ “Ni pe ro, ni pe ro” tia khêk nâinupang tuirivot nei a oma. Thil minli ‘khop tik’ zel nei loi an om:

¹⁶ thân bâi inruak nupang ching, tui hmu loi irnêng châr le, mei chok vung vung an ni.

¹⁷ A pa hmusittu le a nu êrotu mit chu phâi vaâkin kêlsua an ta, raikosohaiin fa an ti.

¹⁸ Ki inhriat thei loi thil minli an om:

¹⁹ Vânlaizôla irmupui lampui, lungpherpha chunga mirûl lampui, tuikhangliana irkuang lampui le pasal le nupang lungirthung lampuihai.

²⁰ Khaang khan a ni, nupang uire ngai lampui khom kha: a fâka, a hmûr a hui vinga, “Thil sual ite tho ma ung,” a ti ngai.

²¹ Thil minli irnêng khomin a ituang zoi thei loi a om:

²² suak kha rêng a hong niin, into a hong irchongin,

²³ nupang nunsia pasal a hong neiin le suak nupang a pi hmun a hong thûlin.

²⁴ Thilhring chînte te minli irnêng chunga hin an oma, khannisianlân, vâr ta taka vâr an ni:

²⁵ Siknghîrhai hi hrât loi tak an nia, khannisian an fâk hrang kholum laiin an bûm zit ngai.

²⁶ Mizupuihai khom hi hrât loi tak an nia, khannisian lungpuihaia an omna an siam ngai.

²⁷ Khâihai hin rêng nei mahaia, khannisian a hlopin an fe ngai.

²⁸ Innghâktehai hi kutpâra chel rip thei an nia, khannisian rêng ina an om ngai.

²⁹ Thil minli an lôn dân le an omdâna roiinpui enhoi an om:

³⁰ kâmkeibaknei, ramsa laia a hrât tak le ite’n laizâm an inthotir thei loi;

³¹ Kêlchal, ui sathei le rênghai an mipuihai makunga lôn hi a ni.

³² Intô taka ni lei irpâk tâk mani, a ninole thil saloi ni lei ngaitua tâk mani a ni’n chu ni bâi hîpin lân, dâihrek roh.

³³ Dût in-ôtin makhon an changtira, hnârdôn irchûmin hnâr thi a insua ngai ang khan, ningmur insuaktirin chu irsualna an suaktir ngai.