THUVÂRHAI 3 - PATHIAN LEKHABU IRTHIANG C.L. Bible (BSI)

Thuzôm hranga chongbe

¹ Ki nâipa, nang ki irchûtirhai hi irnghil viat no’n lân, ni lungrîla ki thupêkhai hi vong mai ro;

² hring dam sôtna le tuanintungnahai nang pe a ti.

³ Iamomna le lungkhamna kha inthâ viat no’n lân, ni ringa inhli maiin lân, ni lungrîl phêka irziak ro.

⁴ Khanchu, Pathian le mihriam mit tungin hong om ni ti.

⁵ Ni lungrîl murdi’n Rengpa iamin lân, nangma inhriatnaa irnghat no ro.

⁶ Ni sintho murdia Rengpa inhre maiin lân, ama’n lampui dik nang irhmutir a ti.

⁷ Nangma irngaiin ki vâr irti no’n lân, Rengpa thu vai zômin lân, sual hnung songsan ro.

⁸ Khanchu, ni taksa hrangin hrisêlna ni a ta, ni ru hrangin irtin ni a ti.

⁹ Ni sum le ni thil invâng a satakhaia khan Rengpa chu chôiindôm roh.

¹⁰ Khanchu, ni fasiar kha buhaiin hong sip a ta, ni isômna khurhai chu uain tharin luang liam a ti.

¹¹ Ki nâipa, Rengpa’n nang a isepna kha ngainêp no’n lân, irdînna chongin bê ro.

¹² Rengpa’n lung a ithunghai chu a sep ngai, pa’n nâi a ilômhai a isephai ngai anga hin.

¹³ Mi vâr hong nia, inhriat thiamna nei irzat mi chu a râlvân a sa.

¹⁴ Tangkarua inlâpna nêkin an lâpa; rângachak nêk khomin a hlu ual.

¹⁵ Vârna chu lunghlu nêk khomin a hlu uala; thil ni inuam murdi inthang khomin irkhî thei ni no ni.

¹⁶ Vârna khan dam sôtna nang pe a ta, khabana irchon le roiinpuina khom nang insiltir sa a ti.

¹⁷ Vârna khan ni hringnun chu hring khonhoina siam a ta, irtharngamna’n nang hruai mai a ti.

¹⁸ Mi vârhai chu an vân a sa, vârna khan hringna pe a ti.

¹⁹ Rengpaa khan vârnain irnêng a siama; inhriatna’n irvân khi a om hmuna a isia a ni.

²⁰ Ama vârna’n tuidung an luangtira, sûmhaiin irnênga rotui inthotir hrangin.

²¹ Ki nâipa, vârna le ngaitua thiamna kha vong maiin lân, ni kuanga irthokin irkiang hrangin phal viat no ro.

²² Hringna nang pe a ta, a ni, hoina le raifânna hringnun nang pe sa a ti.

²³ Khanchu, ni lampuia dam zanin fe thei ni ta, tûk thei no chi ni.

²⁴ Ni zâl tika khom chi no chi nia, a ni, zâl ni ta, zânkhovârin irhnik takin in ni ti.

²⁵ Irningloia siatna hong omhaia khom ni milung dûk tuang no nia, mi siahai chunga phâivopui angin ramna a hong tung khomin chi no chi ni.

²⁶ Rengpa khan nang sûnghual mai a ta, ama khan chânga irkhit hrang nang phal no ni.

²⁷ Itiklai khomin ni thei ngânin chu changpui innanghai chunga sin sa tho mai ro.

²⁸ Ni tualbômhai kuang atûna changpui thei chakin an tûk nghâk ta no ro.

²⁹ Ni tualbômhai chunga ite thil saloi tho phan no ro; ningbeiira ni kôla a iom kêng.

³⁰ Chanlamboiin tûte irngopui no ro; ni chunga ite a tho’nchâi no’n chu.

³¹ Mi nunrônghai irzukhai no’n lân, an om dân anga om khom tum no ro.

³² Rengpa khan sual sin mihai kha a hnôl ngaia, mi felhai chu rual angin a bêhai ngai.

³³ Rengpa khan mi siathai ina chu khosâltongna a siaa, khannisianlân, mi felhai in chu sat a vur ngai.

³⁴ Mi lârirpâkhai chu a hmusit ngaia, irngaiintômhai chu ditsakna a pêkhai ngai.

³⁵ Mi vârhai khan roiinpuina dong an ta, intohai chu mualphoina vai tong an ti.