THUVÂRHAI 29 - PATHIAN LEKHABU IRTHIANG C.L. Bible (BSI)

¹ Mi’n an hril intam dôr a tukullian chu voikhat rengin lan rîl a ta, thoi nôk thei viat ta no ni.

² Hruaitu fel an omin chu mihai an lôm ngaia, hruaitu sia omna rêk chu mihai chap inrungin an om ngai.

³ Vârna irngaiinhlu chu a pa inlômtir a ti. Notizuar chunga a poisa hmang inhek chu inriang a ti.

⁴ Dik takin rêngin roi a rêlin chu ram an ding indet ngaia, fâk inrûk a lâkin chu ram a siat ngai.

⁵ A rualhai inpâk pai pai tum chu ama in-ôkna hranga châng kam a ni.

⁶ Mi felhai zalên le raifân taka om laiin mi saloihai chu an siatna ngeia an irpal ngai.

⁷ Mi fel khan inrianghai chungchâng thu an hriatpuia, mi siahai rêkin chu kha thilhai inhriat thiamna nei ngai mahai.

⁸ Mi dang mahripna nei loi mihaiin chu khopui an inbuai chit ngaia, mi vârhai rêkin chu ningmurna an irkiangtir ngai.

⁹ Mi vârin intô ar khalpuiin chu intô kha an nuia, a mi êsêl an satir ual ngaia; irngeina rêng rêng om thei ngai mah.

¹⁰ Thisen insuaa inhrâl mihai khan mi dikhai an hnôl ngaia, mi felhai rêkin chu mi dikhai hringna an inpâk ngai.

¹¹ Into’n chu a ningmur an lang suaktir ngaia, mi vârhai rêkin chu an milung an suai zâma, an dâihrek ngai.

¹² Ram hruaitu’n milak thu a’rngaiinna’n chu a sinthotuhai murdi an sual ngai.

¹³ Inriang le mi hnuaisiatu irangna tak chu, Rengpa’n an mit a invâr pe ru ruai a ni.

¹⁴ Inrianghai dik taka roirêl petu rêng chu kumkhua’n inlal a ti.

¹⁵ Sepna le irchutirna hi nâipanghai hrangin a sa. Ama nuamlamin a omin chu a nu inzak irhmutir a ti.

¹⁶ Mi siahai an inlalin chu siatna a pung ngai. Mi fel rêkin chu khaang khan mihai inrîlna kha hmu a ti.

¹⁷ Ni nâipa sepin lân, lungirngamna nang pe a ti. a ni, ni lungrîl lômna intung pe a ti.

¹⁸ Lei hmu bakna a om no’n chu, mihai an irhmang ngaia, dân vong insatu rêk chu raiinfân a ti.

¹⁹ Suak chu chongbâi vaia sep thei ni mah. Inhre khom sianlân ngaisak no ni.

²⁰ Mi ngaitua loia chong sêt suat ngai nêkin chu intokhak chu sabei hrang a om ual.

²¹ A nâipangtea irthokin ni suak kha nin dotin chu a hnungkhôna chu nir chon khom nang la’rchûpui a ti.

²² Ninginmur zel zel ngai mihaiin irkhalna le buaina tamtak an kêlsua ngai.

²³ Mi a lârirpâkna irhniamna ata, mi lungrîl irngaiintôm rêk chu chôiirsângin om a ti.

²⁴ Inru irthoppuitu chu ama hringna a ihnôl a ni. Roirêlna hmuna thudik an sîrin chu izêm tong a ta, thudik an sîr no’n chu Pathianin khua sâl a ti.

²⁵ Mi dang irngaidân uksak hrai hi ichi a oma, Rengpa irnghat rêk chu zôk a ti.

²⁶ Mi tamtakin roirêltuhai ngaipoimo dongna an zong ngaia, mihriam chunga roirêlna dik chu Rengpa kuang ata suak a ni.

²⁷ Mi siahai chu mi felhai hrangin intirom an nia, mi felhai khom mi siahai hrangin intirom an ni.