THUVÂRHAI 26 - PATHIAN LEKHABU IRTHIANG C.L. Bible (BSI)

¹ Fûra ivur tâk le bu ât zoroa rotho a irhmê loi angin, intô chôiirsâng hi a irhmê loi a ni.

² A bi boiin chu khua nang sâlhai khan nang insiat thei no nihai. Va vuangpat a chumna indang loi ang kha a ni.

³ Zêmna hrui chu sakor ta hrang a nia, hnôlna hrui chu sakuartung ta hrang a nia, khianghrol chu intohai ruang hrang a ni.

⁴ Chong irdon chanlamboi ni sâmin chu ar dontu angin intô ni ni ti.

⁵ Chong irdon chanlamboi chu chanlamboiin sâmin lân, khanchu ar dontu khan vâr a irti dôr chu vâr mah ti hong inhriat ni ti.

⁶ Intô chong bêtu chu mâni ke tan ang kha a nia; buaina tong a ti.

⁷ Ke’nbâihai ke a irtûl chian ngai angin thuvâr khom hi intô bâia chu a ni ngai.

⁸ Intô inpâk chu saihlia saihlûm khitkhak ang kha a ni.

⁹ Intô, thuvâr hmang chu zû’nrui a kuta ilhling lâk tum ang kha a ni.

¹⁰ Intôhai le invêthai hruaitu chu thal kâp thiam mi inphop ngaitu ang kha a ni.

¹¹ Intô, an tozia inlang ngai chu ui a miluak fâk nôk ngai ang kha a ni.

¹² Vâr lo loia vâr irtitu nêkin chu intô lopzuaka om a sa.

¹³ Itho mo mi thaboi kha pên tiang a isuak viat ngai loi? Imo a ichi? Kâmkeibaknnei mani?

¹⁴ Kopzaa inkhâr a irhêl mai ngai angin, mi thaboi khom a zâlhmuna ar hêl mai ngai.

¹⁵ Mi thaboi khan khalâi an pûr chiana; a bâia bu hong thun ten lua a ngîk ngai.

¹⁶ Mi sari thil sût thiamhai nêkin khom mi thaboi chu ama irngaiin vâr ualin ar bê ngai.

¹⁷ A va irrolna hrang ni viat loia mi irkhalnaa va chang chu lampuia fea ui hong lôn a mikuara chel ang kha a ni.

^18-19 “Mi, a tualbômhai huanga,” inhnunga chu invêt, thingthu hringhai, thalhai, thi theina hmangruahaia irdâi ang kha a ni.

²⁰ Thing a hekin chu mei khom a thia; khaangin insîr irhlôm a om loina chu irngo irkhal a mong ngai.

²¹ Meiholin chu mei ar altir ngaia, thingin chu mei an choktir ngai; khaang khan buaina siamtuhaiin chu irsualna an inpungtir mai ngai.

²² Mi nuiso zazat ngaitu chong chu a thuma, takpum sûngrîla a lût ngai.

²³ Lungrîl suala hmûr thiam chu pil bêl sumtak nâl irtêktir ang kha a ni.

²⁴ Vârirletin chu mi a hnôlna kha chongbâi thumin a thup ngai.

²⁵ Thu sa okin inlang khomsian iam no ro, a lungrîl chu hnôlna sip a ni.

²⁶ A hnôlna chu huangna’n thup thei khom sianlân, a siatna chu vântâng inhriata inlang la ni a ti.

²⁷ Tukhom mi dang in-ôkna hrang châng kamhai chu anni in-ôk an ti.

²⁸ Milaka mi denginthei nuamtuhai chu ni ihnôl hrang a ni. Chong iamom loiin chu siatna vai an tungtir ngai.