THUVÂRHAI 24 - PATHIAN LEKHABU IRTHIANG C.L. Bible (BSI)

-19-

¹ Mi siahai irzuk no’n lân, anni leh rual irchang tum no ro.

² An lungrîla buaina siam vai an ngaitua ngaia; an bâiin mi ningthikna thu vai kêng an insîr ngai.

-20-

³ In chu vârna le inhriat thiamna lungphûma sin indet a ni.

⁴ Inhriatna omna kipa in sûng tentan tinhai chu thil hlu le enhoi takhai irvôtir a ni ngai.

-21-

⁵ Inhriatna nêkin vârna a sa uala; a ni, hrâtna nêkin khom inhriatna a poimo ual.

⁶ Ni doi mân satakin lei irsiamirfôk bakin lân, lungvâr nang phua an tam dôr inhnêna chu chang ni ti.

-22-

⁷ Intôhai hrangin thuvâr chu an hril zita; thu poimo insîr irhlôm zoro’n ite ti hrang tum nei ngai mah.

-23-

⁸ Thil saloi ni phan maiin chu mihaiin buaina siam ngaitu nang ti an ti.

⁹ Intô ngaituana chu sual a ni. Mi hmusit chu mi ihnuaisia an ni ngai.

-24-

¹⁰ Lunginzîng nikhua’n ni’rzal chitin chu ni irzal ta tak a ni.

-25-

¹¹ Dikloi taka that hrang tâkhai chu inzôk lat ro.

¹² “Kei chu ite inhre ma ung” ni ti thei, Pathianin chu ni lungrîl tumna an hriata, a ivarh mai kêng. Nang a thîr chiana; nang an hriat zit. Ni sintho lam ang takin nang thuan nôk a ti.

-26-

¹³ Ki nâipa, khuaihlutui in ro; a isa a ni. Ni mileia khuaithâr ata khuai a ithum angin,

¹⁴ Vârna chu hringna hranga sa a nih ti inhren fel ni ti, vârna ni neiin chu ni sûnmaton ir-âng a ti.

-27-

¹⁵ Mi siahai, mi fel in roka, a in la pe hranga khâr pe ngai mihai angin om no ro.

¹⁶ Mi fel chu voi tamtak inrîl khom sianlân, a thoinôk mai ngai; mi siahai rêk chu siatna’n an irhmang ngai.

-28-

¹⁷ Ni râlin siatna a tongin lôm no’n lân, an rîlin ni raiinfânin ir-iam no ro.

¹⁸ khano’nchu Rengpa’n nang hmu a ta, lôm no nia, a chunga tôkhmol an inlek itinin.

-29-

¹⁹ Thil saloi sintuhai sikin ni beiindong no’n lân, annihai kha irzuk no roh.

²⁰ Mi siahai chu sûnmaton tûng hrang nei mahaia, an meiser chu thatpai ni a ti.

-30-

²¹ Ki nâipa, Rengpa chin lân, rêng kha mahrip tho ro. Anni doia irhel mihai chu irthoppui no ro;

²² Khaanga mihai chu irningloiin irhmangin om an ti. Pathianin a ni no le rêngin an chunga siatna an intung pe thei nin hriat mo?

Thuvâr danghai

²³ Hihai khom hi mi vârhai thu’nsîr a ni: Roirêltu hrangin theibîk nei hi sa mah.

²⁴ Mi pualoi thiam changtu chu, mi tinin hnôl an ta, khua sâl an ti.

²⁵ Roirêltu, mi dikloi intuangtirtu rêk chu mi’n lôm an ta, irhming satna hlo a ti.

²⁶ Dik taka sâmtu chu rual sa a ni.

²⁷ Loimân nir fûktir diama, ni bingin irsinsiam thei ta ki tih ti nin hriat infel mâka chu dong tum no ro.

²⁸ Asan dik tak inhre loiin ni tualbôm chungchâng thu’nhretu ni no’n lân, ni bâi khomin huang no ro.

²⁹ Ki chunga a itho angin a chunga tho ki ti! a tho dân ang takin lei tho rong!” ti no ro.

³⁰ Mi thaboi laia ki fea, inhriatna nei loi mi irhuana ki chai vêla.

³¹ Irngai ta, ilhling kungin a sip zita, hloi vai a oma. A’rhuan dâihai khom a chim rem ruma.

³² Khahai kha ki ena, satakin ni ngaituaa, irchûna satak a nir hmu suaktira, ki pom ta.

³³ Ni nuamin chu insîng viatin lân, in viat ta,

³⁴ ni in kârin inriangna khan inru angin nang chel a ta, irsamna’n sipai angin nang hong de thut a ti.