THUVÂRHAI 23 - PATHIAN LEKHABU IRTHIANG C.L. Bible (BSI)

-6-

¹ Mi lian le khalâi nin otin, ni lungrîla tu mo a inih ti inhre mai ro.

² Nin thang ok khomin irkai viat ro.

³ Fâk nêk tui tak nang a idohaia khan inruak no’n lân; nang huang a itum khom a ni thei.

-7-

⁴ Irchong ringot tuma sôlhai hrangin vâr ro.

⁵ Sum chu mitha irsiama vuangpat angin mit khapkârin vuangpat a ti; irmu vânlaizôla vuang ngai anga hin.

-8-

⁶ Mi tiksia khalâi do ot no’n lân; a fâk itui dohai irzuk no ro.

⁷ “Tho hong ro, hong fa ro” a tiin, a lungrîl taka ti mah. A ngaitua lam ang takin kêng a nina chu a ini.

⁸ Ni fâk kha inluak nôkpai ni ta, ni thu thumhai chu chanlamboi ni a ti.

-9-

⁹ Intô inhriata chong omze nei hril tum no ro; ni thuvârhai kha inhlutna lam inhre no ni.

-10-

¹⁰ Tianlai ramri milui kha phêt viat no’n lân, farahai ram irchupuihai no ro.

¹¹ Rengpa chu anni sûnghualtu hrâttak a nia, nangma doiin an chungchâng thop a ti.

-11-

¹² Irchutirna tiang ni lungrîl pêkin lân, ni mikuar kha inhriatna thu tiang sung ro.

-12-

¹³ Nâipang sep indîn no ro. Irchutirna khianghrolin zêm khomin lân, thi no ni.

¹⁴ Khianghrolin nir chutirin chu thina ata a hringna inzôk thei ni ti.

-13-

¹⁵ Ki nâipa, ni vârin chu ki lungrîl lôm tak tak a ti.

¹⁶ A ni, ni bâi ata vârna thu kin hriatin lôm ki ti.

-14-

¹⁷ Ni lungrîlin mi sualhai irzuk no ri se; Rengpa chitna hi ni hringnun thupui tak ni ri se.

¹⁸ Khanchu ni sûnmaton ir-âng a ta, ni sabeina chu inboipaiin om no ni.

-15-

¹⁹ Ki nâipa, irngaiin lân, vârin lân, ni hringna lampui ngaitua inthûk ro.

²⁰ Zu indu mihai le fâk indu mihai irpôlpui no ro.

²¹ Zû’nrui mihai le rôlruakhai chu hong inriang tîr tîr an ti. Fâk le nêk zâl vai ni tho’n chu puanchet sil zôi zel ni ti.

-16-

²² Ni pa, nang neitu thu irngaiin lân; ni nu kha a hong tarin hmusit no roh.

²³ Thutak chu irchôkin lân, thiamnahai le inhriat thiamnahai leh khan ircho roh.

²⁴ Mi fel pa chu satakin a raifân a ta; nâipa vâr neitu chu lômna nei a ti.

²⁵ Ni nu le ni pa chu inlômtirin lân, nang a neitu, ni nu chu raifân takin inomtir roh.

-17-

²⁶ Ki nâipa, ni lungrîl ni pe’n lân, ki hringnun hi ni enton ni ri se.

²⁷ Notizuar le nupang nghal chu thina châng ang an ni.

²⁸ Hrâtlâksonghai angin nang an irdîp chiana; mi tamtak irthiang loina an inthâk ngai.

-18-

^29-30 Tuhai mo chungrik ngai, tuhai mo beidong ngaia, tuhai mo ar khal ngai? Tuhai mo thubuai nei ngai, tuhai mo a bi om loia sâbe tuang ngai? Tuhai mo an mit cho khak ngai kha? Zû buala om mai ngaihai, zû induhai kha an ni.

³¹ Zu’n nang a inthêm hrang phal no ro, a sen rak khomin, ar fi liai khomin, a ni no le a phûl but but khomin en no ro.

³² A hnungkhôna chu mirûl angin nang inchuk a ti.

³³ Ni mitin thil irkhêltakhai hmu ni ta, ni lungrîla ngaituana fel nei thei no chi ni, fel tak khomin chong thei no chi ni.

³⁴ Tuikhanglian chunga zâl angin mani, irkuang puanzâr ngul sîpa om mani angin ni nih ti.

³⁵ “An ni zêma, khannisian ite lak inhre ta ma ung. Itho mo ki ihar thei viat loi? La in nôk mai ki inang kêng” ti nih ti.