THUVÂRHAI 2 - PATHIAN LEKHABU IRTHIANG C.L. Bible (BSI)

Vârna lômman

¹ Ki nâipa, ki’rchûtirna thuhai ni poma, ki thupêkhai nir tika,

² kha vârna tiang ni mikuar ni sunga, ni lungrîl inhriat thiamna tiang ni pêkin chu;

³ a ni, inhriatna chu ni zonga inhriat thiam theina khom ni ngêna,

⁴ tangkarua angin ni zonga, irchon irthup angin ni zongin chu,

⁵ Rengpa chi hi imo a ini hong inhren fel ta ni ta, Pathian inhriatnaa khan tuanintung ni ti.

⁶ Rengpa kêng vârna mi pêk ngai, ama bâia irthokin inhriatna le inhriat thiamna a isuak ngai a ni.

⁷ Mi nunhoi hrangin vârna dik a buk khôma, mi dikhai hrangin ama chu phô a ni.

⁸ Theibîk neiloi mihai kha a donsuia, a mi irthianghai chu a vong insa ngai.

⁹ Ki thu tiang ni mikuar ni sungin chu, theibîk nei loinahai le lampui sa tinrênghai khom hong inhre thiam thei ni ti;

¹⁰ vârna chu ni lungrîla lût a ta, inhriatna khan ni hringna inlômtir a ti.

¹¹ Ni lungrîl neina khan nang hruai a ta, ni inhriat thiamna khan nang enkol a ti.

¹² Sual lampuia irthokin nang sansuak a ta, chanlamboi hrila buaina nang siampui ngai mihaia irthokin nang khâi irkiangtir a ti.

¹³ Sual zîng kâra lêng hranga felna lampui hnungsongsan mihai,

¹⁴ thil saloi sina raiinfân ngaihai, siatna porinchea lôm ngaihai,

¹⁵ an lampuihai chu a kôia, tung thei zât ni mah.

¹⁶ Nupang om papai, a chongbâi thiamna sika nang porinchetir tum ata chu nang saninzôk a ti,

¹⁷ a vânglaiin pasal chunga iamom loia, Pathian makunga a chonginkung irnghil ngai mi rengata kha.

¹⁸ A in khan thina lampui a’rnghata, a lampuihai chu mi thi lampui a ni.

¹⁹ Tukhom a kuanga fe kai chu kîr nôk viat ngai maka, hringna lampui tiang irnghat nôk viat ngai mah.

²⁰ Khasikin, mi dikhai lampui zuiin lân, nundân fel takin hring ta ro.

²¹ Mi fel, mi nunhoihai khan hi ram hi lua an ta, mi dikhai chu khatak khan om mai an ti.

²² Mi siathai rêk chu hi ram ata Pathianin irzûlpaihai a ta, mi sualhai khom thingkung angin thatpaihai a ti.