THUVÂRHAI 19 - PATHIAN LEKHABU IRTHIANG C.L. Bible (BSI)

¹ Mi, milak vai thoa lan to nôk nêkin chu, mi’nriang lungrîl satak irputa om a sa ual.

² Inhriatna boia nuamna ringot khom hi sa ma; milung inrang hrai mi chu buaina a tong ngai.

³ Mi senkhatin an invêtna’n anni na nâk an siata, khanchu an lungrîlin Rengpa an nuar ngai.

⁴ Irchonghaiin rual tamtak an neia, inrianghai rêkin chu an rual nei sunhai khomin an mâksanhai ngai.

⁵ Inhriatpuitu dik loi chu tôkhmol tuang loiin om no nia, milak chong chungirchuan chu zôk no ni.

⁶ Mi tamtakin mi lianhai ditsakna dong an tum ngaia; ditsaktu hrangin chu tinrêng rual sa an ni.

⁷ Mi’nriang chu a’rzirpuihai lua khomin san nuam ngai mahaia; a rualhai len vângin chu tûte hmu no ni.

⁸ Vârna nei khan ama hringna lung a ithung a ni; inhriatna neitu chu vânnei a ti.

⁹ Inhriatpuitu dik loi chu kuttum tuang loiin om no nia; milak tho ngai chu irhmang a ti.

¹⁰ Intô chu hringnunhoiin om no sianlân, suak khom rêng nâihai chunga irchamnei no ri se.

¹¹ Irngai thiamna nei mi’n chu, a ningmur an suai thei ngai. Mi tho’nsualna uksak loi hi roiinpuina a ni.

¹² Reng ningmurna chu kâmkeibaknei inrung ang kha a nia, a ditsakna rêk chu satvur rua ang kha a ni.

¹³ Nâipa into’n chu a pa hrang vânduaina an tungtir ngai. Dôngma hrângsia chu itiklai khoma tui zung mai ang kha a ni.

¹⁴ Mi’n a pa ata in le loi irchonhai a lua thei, khannisian Rengpa tak ata vaiin kêng dôngma vâr chu hmu thei a ini.

¹⁵ Ni nuamin chu nir tha inboi mai ro; zâl mai ro, khannisian phîngchâmin om ni ti.

¹⁶ Rengpa dân zôm indik murdi’n a hringna a ivong insa a ni; a omlama irdîn loi rêkin chu thi a ti.

¹⁷ Inrianghai san chu Rengpa a intângtir ang kha a nia, a sintho sa chu Rengpa’n thuan a ti.

¹⁸ Ni nâihai kha an la nâiinpang laiin sep ro. khano’nchu, an irhmangna hrang lampuia changpuitu ni ni ti.

¹⁹ Milung hrâthai ina chu tôkhmol a tong ngai. Buaina ata ni kêlsua khomin, la kêlsua nôk mai la nang a ti.

²⁰ Irchûna tiang ni mikuar ni sunga, irchû ni nuamin chu mi vâr la hong ni ni ti.

²¹ Mihriam lungrîla thil tamtak ngaitua om khom sianlân, a hnungkhôna chu Rengpa lungdo sin ni a ti.

²² Huatirham hi mualinphoina a nia; mi minlakhai nêkin chu inrianghai an sa ual.

²³ Rengpa thu zôm hin hringna an tungtira, a zôm murdi’n lungchuk takin an oma, thil saloi irkhum om ngai ma.

²⁴ Mi senkhat chu an bâia bu hong thun lua khom an rin ngai.

²⁵ Mi irsonghai tôkhmol tho a sa, khanchu mi’nmôlhai hong irchû thei an ti. Inhriat thiamna nei chu hrilin lân, hong vâr a ti.

²⁶ A pa dengintheitira, a nu inhnotsuaktu chu, nâipa mualinphoina intungtirtu a ni.

²⁷ Ki nâipa, irchutirna ni mâkin chu ni inhriat tâkhai khom kha irnghil thai ni ti.

²⁸ Thu’nhretu dik loi chu roirêlna a ihmusit a ni. Mi siahai khan sualna lung an thung ngai.

²⁹ Roirêlna chu mi irsonghai hranga siam a nia; tôkhmol chu intohai inruangna hrang a ni.