THUVÂRHAI 15 - PATHIAN LEKHABU IRTHIANG C.L. Bible (BSI)

¹ Sâmna irnêmin chu ningmurna ar kiangtir ngaia, henhrum rêkin chu ningmurna an pungtir ngai.

² Mi vârhai an chongin chu inhriatna nei irzuk a omzia an langtir ngaia, intohai rêkin chu chong chanlamboi an hril ngai.

³ Rengpa mit chu hmun tina a oma; ei sin sa le saloi a thîr mai ngai.

⁴ Lungkham chongin hringna a pêka, nunrôngna chong rêkin chu lungrîl an siattir ngai.

⁵ Into’n chu a pa irchutirna zong ngai maka; mi vâr rêkin chu irchutirna a pom ngai.

⁶ Mi felhai khan irchon tamtak an hrêa, mi pualoihai inlâpna chu buaina a om ngai.

⁷ Mi vârhai khan inhriatna an sem indara, intohaiin chu khaang khan tho mahai.

⁸ Mi pualoihai irbôlna chu, Rengpa ta hrangin intirom a nia, mi felhai chongchaina chu a ifel a ni.

⁹ Rengpa khan mi siahai lampui chu a hnôla, felna lampui zuituhai rêk chu lung a thung ngai.

¹⁰ Thil sual sintu chu a sate’n denginthei ni a ti. Irchutirna pom loi chu irhmangna a ni.

¹¹ Mithi khua Rengpa’n a hmu zita, mihriam lungrîl len vâng chu hmu’n fel zit a ti na!

¹² Mi hmusit song ngaihai khan irchutirna nuam ngai mahaia; mi vârhai kuang khom ite irdon nuam ngai mahai.

¹³ Lungrîl a lômin chu irtha an fântira; lungrîl beidongna’n chu hmêl an ngûitir ngai.

¹⁴ Mi bengvârhaiin irchutirna an nuama, intohai rêk chu an intona khan an milung a chuk ngai.

¹⁵ Dengthei tuangtu hrangin chu sûn murdi hi a saloi inzen a nia, mi lungrîl irthâhai chu a nitin raifânin an om mai ngai.

¹⁶ Rengpa chia, inriang chu irchonga buaina nei nêkin a sa ual.

¹⁷ Sechal hmê leh tuitaka bukhalâi ota, milung irhoi loi nêkin, anhring fâka inthurual taka bu nêk chu a sa ual.

¹⁸ Milung hrâtin irkhalna an suaktira, lung ir-ialin chu irngeina an tungtir ngai.

¹⁹ Mi thaboiin chu hmun tina intakna tong a ta, mi dik rêkin chu buaina nei no ni.

²⁰ Nâipa vârin chu a pa an lômtir ngaia. Into vai kêng a nu a hmusit ngai.

²¹ Intohaiin chu an intona kha an raifânna a nia, mi vârhai rêk chu thil sa an sin ngai.

²² Ngaitua bak loia sin tho chu tuanintung ngai maka; lungvâr sak thei tamna chu hmanchang suana a om ngai.

²³ A zoro taka sâmna dik tak inhriat hi lôm an om vang na!

²⁴ Mi vârhai chu hringna panna lampuia an fea; thina panna lampui chu an mâk ngai.

²⁵ Rengpa’n mi irsonghai in chu inkarpai a ta, meithâi irchon rêk chu sûnghualpui a ti.

²⁶ Rengpa’n ngaituana sualhai chu a hnôla, mi irthiang chonghai chu a lôm ngai.

²⁷ Mi huatirham khan ama in sûngkua an buai ngaia, fâk inrûk fa ngai loihai rêk chu irfûktir a ti.

²⁸ Mi sahaiin chu mi an itih pe hrang lam an ngaitua bak ngaia. Mi saloihai rêkin chu mi an sâm zôi zela; buaina an insua ngai.

²⁹ Mi sahai chongchaina chu Rengpa’n ar ngaitua ngaia, mi siahai rêk chu a hla pehai ngai.

³⁰ Râifân hmêlin mi an lômtira, thurchi lômomin mi an hartir ngai.

³¹ Hringnun siam indikna irngai theina neitu chu, mi vârhai laia om a ti.

³² Irchûna nuam loi chu mâni irhmusit a nia, irchutirna pom rêk chu hong vâr a ti.

³³ Rengpa chi hi vârna irchutirna a ni zela. Irngaiintômna chu chôiirsângna omna a ni.