THUVÂRHAI 12 - PATHIAN LEKHABU IRTHIANG C.L. Bible (BSI)

¹ Tukhom inhriatna lungthung murdi’n chu irchutirna a’rngaiinnata, khannisian halirchûna khôkmâktu chu intô a ni.

² Rengpa’n mi siahai chu a ngaisak ngaia, pualoina lungrîl nei mihai rêk chu thiam no an chang ngai.

³ Pualoina’n mihai dikna pe ngai maka, khannisian mi felhai chu inhnîng viat no nihai.

⁴ Nupang omlam sa chu a pasal hrangin lômna le rênglukhum a nia, nupang, a pasal hranga hmâimôk intungtu rêk chu a ru zêm inkhiaktu ang kha a ni.

⁵ Mi dikhai ngaituana chu a fela; mi siahai roizêk chu huangna a ni.

⁶ Mi siahai chong chu thisen insua hranga inruangna a nia, mi felhai chongbâi suak rêkin chu irlo inthinghai a sansuak ngai.

⁷ Mi siahai chu irchi suanpâr boiin irhmang an ta, mi felhai in sûngkua chu om mai an ti.

⁸ Mi bengvârin chu inpâk hlo a ta, mi’nvêt rêk chu mi’n hmusit an ti.

⁹ Mi lian anga oma fa hrang nei loi nêkin chu, mi narân mânia fâk hrang nei a sa ual.

¹⁰ Mi sa khan a thilhringhai a donsui ngaia, mi pualoi rêkin chu thilhring chunga an ningmur an inlangtir ngai.

¹¹ Takirtâia sintho mi khan fâk hrang a neia, chanlamboi sina zoro pai ka chu invêtna a ni.

¹² Mi siahai murdi’n thil sual tho hrang an zong ngaia, mi fel chu det takin an ngîr indet ngai a ni.

¹³ Mi sia chu a chong ngeia an ôk ngaia, mi dik chu buaina a lôi ngai.

¹⁴ Mi’n a ichong lam ang takin lômman hmu a ta; ama kuta a sintho ngei kha a kuang inhlan ni a ti.

¹⁵ Intohai khan chu anni mita hmuin dik irti an inhriat ngai. Mi vârhai rêkin chu irchutirna an irngaitua ngai.

¹⁶ Intô ninginmurna chu voikhat rengin an langa; mi vâr rêkin chu êsêlna hnung a songsan ngai.

¹⁷ Thudik hril chu dikna sin a nia, milak rêkin chu roirêl dikloina tiang a kaihruai ngai.

¹⁸ Intô chongin chu khandai isun nêkin a sun inna ngaia; mi vâr chong rêk chu damna a ni.

¹⁹ Milak chu sôtnotea hrang vai a nia, thutak chu kumtuangin om mai a ti.

²⁰ Thil sual ngaituatuhai ka chu thilirkhêl ichiom tak tong an ta, tukhom sin sa sinhai ka chu lômna hmu an ti.

²¹ Mi felhai chunga chu chanlamboi siatna chum ngai maka, mi siahai chu buaina vaiin sip an ti.

²² Rengpa’n milak thohai a khôkmâka, an chong iamomhai chu a lôm ngai.

²³ Inhriatna nei mihaiin chu an inhriatna an thupa, mi’nvêt rêkin chu an intona an inpuang ngai.

²⁴ Takirtâina’n irchamneina a pêk ngaia; thaboina’n chu suakin a siam ngai.

²⁵ Lunginkângna’n raifânna an boitir ngaia, lungkham chongin chu mi an lômtir ngai.

²⁶ Mi fel chu a rual hrangin hruaitu a nia, mi pualoi lampui chu irhmangna tiang a hruai ngai.

²⁷ Mi thaboiin chu a irzuk man thei ngai maka, mi takirtâi rêkin chu irchon tamtak nei a ti.

²⁸ Felna hi hringna lampui a nia, siatna hi thina lampui a ni.