THUVÂRHAI 11 - PATHIAN LEKHABU IRTHIANG C.L. Bible (BSI)

¹ Irtêna dikloi hmanghai chu Rengpa’n a hnôla; irtêna dik hmanghai chu a lôm ngai.

² Mi lârirpâkhai chu mualinphoiin om zôi zel an ti. Irngaiintômhai kuang khan vârna a om.

³ Mi fel chu a dikna khan hruai a ti. Mi vârirlethai chu dikloina’n irhmangtir a ti.

⁴ Ningmurna nî sûn chu irchon sum puanin inlâpna nei ta no ni, dikna’n chu thina ata ni hringna inzôk a ti.

⁵ Mi sa dikna khan a hringnun an hoitir ngaia, mi sia chu a sualna’n irhmangtir a ti.

⁶ Mi diktak felna khan anni an zôktir ngaia, iamom loituhai chu an huatirhamnaa an in-ôk ngai.

⁷ Mi sia a thi’n chu a tûngna khom a thi sa ngai. Irchona irnghat chu chanlamboi a ni.

⁸ Mi felhai chu lungzîngna ata hrungin an oma; mi siahai chunga a chum ngai.

⁹ Pathian ngaisak loi mihai chong khan a tualbômhai an siat ngaia, mi fel vârna chu mi dikhai a saninzôk ngai.

¹⁰ Mi dikhai an tuanintung kârka chu khua le tui a raiinfâna, mi siahai an thiin raifânna khêk mur mur a om ngai.

¹¹ Mi felhai satvurna’n khua chôiindômin a oma, mi siahai chongbâi rêk chu an siattir ngai.

¹² Mi dang hmusit khan vârna nei maka. Inhriatna nei mi rêkin chu a dâihrek ngai.

¹³ Mi hmûr thiam chai chian chian ngai mi chu thu’rthup ip thei ngai maka, lungrîl dik nei mi rêk chu a ip thei ngai.

¹⁴ Irhruaina dik a om no’n chu nam ar hmang ngaia. Mi roizêk thiam tamna chu zôkna a om ngai.

¹⁵ Tukhom khual mi lâkai tuam pe hranga chonginkung chu irsîr a ti. A thubuai a kop loi khan lungirngam riamin om a ti.

¹⁶ Nupang sa’n chu mahrip a hloa, khannisianlân, nupang om pai paiin chu mualinphoina a ni. Mi thaboiin chu sum nei ngai maka, khannisian mi takirtâi mi chu irchong a ti.

¹⁷ Lungkham nei mi khan ama hringna hranga thil sa a isin a ni. Mi nunrông rêkin chu ama takpum dengtheina an tungtir ngai.

¹⁸ Mi siahai chu irhuangna hlo an man ngaia, felna inthektu rêkin chu lômman an dong ngêt ngai.

¹⁹ Tukhom sin sa sin tum ngit kai chu hring an ta, tukhom thil saloi sintu chu thi an ti.

²⁰ Rengpa’n lungrîl sual mihai kha a hnôla, thil sa thohai chu lung a thung ngai.

²¹ Mi siahai chu dengintheitirin om an ta, mi felhai rêk chu zôk an ti.

²² Nupang hmêl sa, lunginchongnaboi chu vok hnâra rângachak irthei irhli ang kha a ni.

²³ Mi sain a inuam inthang chu satna inzen a nia, mi siahaiin an inuam inthang an hmu’n chu mi tinrêng ningmurna a ni ngai.

²⁴ Mi tikhoi thil phalna’n ar chongtir sit sita; mi tiksia intikna chu inriangna a ni.

²⁵ Mi tikhoi chu hong inchum pe ual mai a ta; mi changpui ngai kakaiin changpui an dong ngai.

²⁶ A man tam hrang nghâka bu inhroitu chu mi’n khua sâl an ta, a zuartu chu inpâk an ti.

²⁷ Takirtâi taka satna zongtu khan ngaisakna a izong a ni; buaina hrang zongtu rêk chu ama chunga buaina tung a ti.

²⁸ Mâni irchon tûng ka chu sâla thinghnahai angin chil an ta, mi fel rêk chu fûr thinghna angin hong indôn a ti.

²⁹ Mâni in sûng inbuaitu chu a hnungkhôna ite nei no ni. Intohai chu mi vârhai suak chang mai an ti.

³⁰ Felna ra chu hringna a nia, nunrôngna rêkin chu hringna a lâkpai ngai.

³¹ Mi fel ka chu hi irnêng chung ngeia hin lômman pêk an ni ngaia, mi sia le thil tho’nsualtu khom dengtheina tong ngêt an ti.