THUVÂRHAI 1 - PATHIAN LEKHABU IRTHIANG C.L. Bible (BSI)

Thuvârhai hlutna

¹ Israel rêng, Davida nâipa Solomona thuvârhai chu.

² Vârna le irchûtirna sa, inhriat theina hranghai le thu omzia inthûk taka inhriat theina hrang chu a ni.

³ Vâr taka omlam le felna hai, dikna hai le theibîk nei loinahai nang irchutir an ti.

⁴ Inmôlhai vâr takin a siam theia; ruathartehai inhriatna irzat nei lam ar chutirhai ngai.

⁵ Hi thuvârhai hin mi vârhai inhriatna ar bôktir theia; mi thiamhai lampui a’rhmutir thei ngai.

⁶ Khanchu, thuvârhai omzia irthup hrilfia theina hrang le mi vârhai thubuai phorsuaka inhriat thiamna hranghai chu an ni.

Ruathartehai kuanga chongbe

⁷ Rengpa chi chu inhriatna bul a ni. Khannisianlân, invêthaiin chu vârna le irchûtirna an hmusit ngai.

⁸ Ki nâipa, ni pa irchûtirna hi irngaiin lân, ni nu irchûtirna hi irheisan no roh.

⁹ An irchûtirna khan ni lua hrangin lukhum roiinpui tak le ringa irthei enhoi tak angin ni nunchan inlang a ti.

¹⁰ Ki nâipa, mi sualhaiin nang an inthêmin zôm no ro.

¹¹ “Tho ba, mi that hrang lei zong rei! A bi om loiin mi poi tholoihai len ruang hi rei!

¹² Ei irtong tiang a hringin irtongpui khom inlân, ei irsen tiang chu a thiin lei mahai rei!

¹³ Thil hlu tinrêng nei ei ta, râllâk sumin ei in lei insip rei!

¹⁴ Tho, kin laia kopin lân, ei iman murdi lei irkop rei” an tia.

¹⁵ Ki nâipa, khaanga mihai laia kop no’n lân, anni ata irkêm ro.

¹⁶ Anni chu thilsual tho hrangin an irhnota, thisen insua hrangin an irsiam chak a ni.

¹⁷ Vahai mithmua châng kam ite ar fêna om mah;

¹⁸ Khannisianlân, khaanga mihai khan anni ngei in ôkna hrang châng an kama, an thina hrang ngei châng an ikam a ni.

¹⁹ Itiklai khomin inru thilin an rûktu hringna a lâk ngaia, khasikin, tukhom thisen insua mihai murdi fena lampui chu khaang kha a ni.

Vârna ikoihai

²⁰ Irngai ta! vârna chu khopui mikotsua haia khan inring takin a khêka.

²¹ Inring takin khopui mikotbâi irsenna hmuna a ikhêk a ni.

²² “Inmôlhaio! I dôr ten mo nin inmôlna nin ikan hrang? I dôr ten mo inhriatna hmusitna hin nin râi nin infân hrang? Ni irchû viat loi hrang mo?

²³ Nangni ki hrilna tiang hin nin mikuar sung roi; thu sa nangni irchûtir ki ta, kin hriatna nangni lei sem hi rong.

²⁴ Nangni ki koi maia, hong hrangin nangni ki ifial a ni, khannisianlân, ite bê’n bê mak chêia, keima tiang khom nin mikuar sung nuam mak chêi.

²⁵ Nangni ki’rchûtirna uksak nuam mak chêia, nangni ki hrilna murdi khom pom nuam mak chêi.

²⁶ Khasikin, intak nin tong tikin nangni phengsan ki ti.

²⁷ Nin chunga irlo inthingna phâivua angin a hong tunga, lungzîngna phâivuapui angin a hong hrânga, dengthei le irthanvâia nin om tikin.

²⁸ Kha tenin chu ni koi nin ta, khannisianlân, nangni sâm thei no ning. Kil tina ni zong vêl nin ta, khannisian ni hmu ta no chin ni.

²⁹ Inhriatna hmang nuam viat mak chêia, Rengpa thu khom zôm nuam viat mak chêi.

³⁰ Nangni ki irchûtirna hi dong nuam mak chêia, ki ihrilhai murdi nin ngainêpa.

³¹ Khasikin nin irhoi lam ang takin hmu nin ta, nin sinthohai ngei khan nangni zêm a ti.

³² Mi’nmôlhai chu vârna an hmusit sikin an thi ngaia. Intohai khom an lungchukna kha an irhmangna a ni ngai.

³³ Ki thu irngaihai rêk chu hoi takin om an ta, chitna zel om loiin, hoi riamin om ta an ti,” tiin.