THUPHUANG 8 - PATHIAN LEKHABU IRTHIANG C.L. Bible (BSI)

Irsinsia sarina

¹ Belrate khan irsinsia a sarina kha an hong le chu, dârkar chimrip vêl irvân an thim chita.

² Khan, vântîrtôn sari Pathian makunga ngîr ngaihai kha ki hmua, an kuang bekul sari an pêka.

³ Vântîrtôn dang a honga, rângachak mirimhoi hâlna kok chôiin maichâm kôla a ngîra, Pathian mihai chongchaina le rêngtoihmun makunga rângachak maichâm chunga inhlan hrangin a kuang mirimhoi tamtak an pêka.

⁴ Mirimhoi khu kha Pathian mihai chongchaina le vântîrtôn kuta irthokin Pathian makunga a fe ta.

⁵ Khan, vântîrtôn khan mirimhoi hâlna kok kha a lâka, maichâma meiin an sipa, irnênga a paithâka, khanchu, hnukirhai, khonri hai, kôlirtêk hai, hnîngnu hai a hong om zôi ta.

Bekulhai

⁶ Khan, vântîrtôn sari bekul sari chôihai kha tum hrangin an irsiam ta.

⁷ Vântîrtôn inkhatna khan a bekul a hong tuma, irial le mei thisen leh irpol a hong oma; ama kha irnênga bunpaiin a om ta. Khanchu, irnêng hmun thuma sena hmunkhat chu a kânga, thingkunghai khom hmun thuma sena hmunkhat a kânga, hloisûl hringhai murdi khom a kâng sa ta.

⁸ Vântîrtôn an hnina khan a bekul a hong tuma, tâng lianpa meiin a ikâng lai ang tuikhangliana an paithâka. Khanchu, tuikhanglian hmun thuma sena hmunkhat chu thisen a chang tâka,

⁹ a sûnga thilhringhai khom hmun thuma sena hmunkhat chu an thia, irkuanghai khom hmun thuma sena hmun khat chu an siat sa tâka.

¹⁰ Vântîrtôn an thumna khan a bekul a hong tuma, ârsi lianpa, meiser anga chok, irvân ata zuang tâkin vadung hmun thuma sena hmunkhat le tuikhanglian kha a dela.

¹¹ (Kha ârsi irhming kha “A khâ” a ni). Tui hmun thuma sena hmunkhat chu a hong khâ tâka, kha tui kha an ina, mi tamtak an thi ta, a kha tâk sikin.

¹² Vântîrtôn a minlina khan a bekul a hong tuma, khanchu, misa hmun thuma sena hmunkhat, tha hmun thuma sena hmunkhat le ârsihai hmun thuma sena hmunkhat chu intôk siat a nia, khahai kha hmun thuma sena hmunkhat an thim theina hrangin. Khanchu, sûn hmun thuma sena hmunkhat chu vâr om ta maka, zân khom hmun thuma sena hmunkhat chu an thim khak tâka.

¹³ Khan, ki hong ena, irmupui vânlaizôla vuangin hnukirhai inring takin, “Vântîrtôn inthumhai bekul la tum hranga irhai hong om hrang sika khan irnênga omhai chung a rik e! a rik e! a rik e! a ti kin hriata.