THUPHUANG 6 - PATHIAN LEKHABU IRTHIANG C.L. Bible (BSI)

Irsinsianahai

¹ Belrate khan irsinsiana sari laia inkhatna kha an hong lai ki hmua, thilhring minlihai laia inkhat khan hnukirhai khonri ang dôra inringin, “Hong roh!” a iti kin hriata.

² Khanchu, ki hong ena, sakor ngoi ki hmua. A chunga chuangtu khan thal a chôia, a kuang rênglukhum an pêka; inhne pumin le inhne thiai mai hrangin a suak tâka.

³ Khan, Belrate khan irsinsiana an hnina an hong le chu, thilhring an hnina khan “Hong roh! a iti kin hriata.

⁴ Sakor dang a sen a hong suaka. A chunga chuangtu kuang khan mihriamhai an irthat irhlômna hrangin irnênga irsualna intung theina thu an pêka, a kuang khandai lian tak an pêk sa.

⁵ Khan, Belrate khan irsinsiana an thumna an hong le chu, thilhring an thumna khan, “Hong roh!” a iti kin hriata. Ki hong ena, sakor vom ki hmua. A chunga chuangtu khan thil varna bop khat a kutin a chôia.

⁶ Thilhring minlihai lai ata suak ni le irhoi hnukirhai kin hriata, “Fapui khamphulu khat sûn khat hlo, barli khamphulu thum sûn khat hlo, khannisian, oliv thing le grep irhuan chu insiat no roh,” a iti kin hriata.

⁷ Khanchu, Belrate khan irsinsiana a minli an hong le chu, thilhring a minlina khan, “Hong roh!” a iti kin hriata.

⁸ Ki hong ena, sakor dâng ki hmua. A chunga chuangtu irhming kha Thina a nia, mithi khua’na zui sa. Khandai hai, châm hai, hri hai, ram sahrâng hai hmanga that hrangin irnêng hi hmun minlia sena hmunkhat chunga irchamneina an pêka.

⁹ Khanchu, Belrate khan irsinsiana a ringana an hong le chu, Pathian thu an insîr sik le Pathian inhriatpuitu an nina tiang iam a om sika thata omhai irtha kha maichâm hnuaia ki hmua.

¹⁰ Anni khan hnukirhai inring takin, “Itinrêngthothei Rengpa, A’rthiang le A diktu! Idôr ten mo irnênga mihai chunga roirêl loiin kin thisen phuba la loiin ni iom hrang?” tiin an khêka.

¹¹ Khan, an rêngin puan chek an pêk senga, an suak chanpuihai le an urênghai, anni thata an lei iom ang dêna om hranghai kha an irkip mâka chu la nghâk ual hrangin an hrila.

¹² Belrate’n irsinsiana ki rukna an hong lai kha ki ena, Hnîngnupui a hong inhnînga, misa kha samul puan vom angin a hong duka, tha khom thisen ang dôrin a hong sen tâka.

¹³ Phâivopui theipui ra selhai a inthingpai zit ngai angin ârsihai kha irnênga an chil chûm chûm tâka.

¹⁴ Irvân chu lekhabu an inzuatpai angin, a boi tâka; tâng le chômbung tinrêng kha an omna hmun rengata ithînpaiin an om tâka.

¹⁵ Khanchu, irnênga rênghai, roirêltuhai, sipai uliantakhai, irchonghai, mi lianhai, mi tinhai, suakhai le suak ni loihai murdi kha pûkhaia le tânga lungpuihaia an irbîka.

¹⁶ Tânghai le lungpui kuang khan, “Ni delin lân, rêngtoihmuna toitu hmêla irthok le Belrate ningmurna ata ni thup roi!

¹⁷ An ningmurna nikhua ichiom tak kha a itung tâk kêng, tu mo ngîra doi thei hrang?” an tia.