THUPHUANG 4 - PATHIAN LEKHABU IRTHIANG C.L. Bible (BSI)

Irvâna rêngtoihmun le a toitu chubai mûkna

¹ Kha irzoiin chu inlârna dang ki hmua, ki hong ena, irvâna mikot irhong ki hmu. Khanchu, bekul irhai ang hnukirhai kin hriat masaa ni chongpuitu khan, “Hi hin hongin lân, inhnunga thil hong om hranghai nang inhmutir ki ti,” a tia.

² Khanchu, voikhat rengin Irtha’n ki om zôi zela, irvân toihmun a hong irsiama, kha toihmuna khan mi inkhat a hong toi saa.

³ Khan, a toitu kha Jasper le Karnelian lung hlu dôrin an langa, rêngtoihmun vêla khan sumrisâng emerald lung rông angin ar zâm sa.

⁴ Rêngtoihmun kôl vêla khan rêngtoihmun dang sômhni minli a om saa, kha rêngtoihmunhaia khan upa sômhniminli puan chek sila rângachak rêng lukhum khumin an toi.

⁵ Rengtoihmuna irthokin kôlirtêk, hnukirhai, khonri hai an hong suak dur dura. Rengtoihmun matona khan meiser sari a choka, khahai kha Pathian Irtha sarihai kha an ni.

⁶ Rengtoihmun matona ngîr khan Krustal lung anga vâr hlîmen tuikhanglian anga a om sa khan, rêngtoihmun irhîlin thilhring minli mân tiang le hnung tiang mita sip an oma.

⁷ Thilhring inkhatna chu kâmkeibaknei a anga, inhnina chu sehrâtchal a anga, an thumna chu mihriam hmêl a anga, a minlina chu irmupui vuang lai a anga.

⁸ Kha thilhring minlihai khan mitha kiruk an nei seng, kha an mithahai kha sûng tiang le pên tiang mita sip an ni. A sûn a zânin, “Rengpa Pathian Itinrêngthothei, A om tâka le A om maia le A la om hrangtu chu A’rthiang e, a’rthiang e, a’rthiang e, tia sakin mong ngai mahai,” tiin.

⁹ Khan, thilhring minlihai khan rêngtoihmuna toi kumtuanga hring mai kuanga khan roiinpuina le chôiindômna hla an saka, lômthu an insîr rikipa,

¹⁰ Upa sômhni minlihai kha rêngtoihmuna toitu makunga khan inbokin kumtuanga hring maitu kha chubai an mûka. An rênglukhumhai kha rêngtoihmun matona siain,

¹¹ “Kin Rengpa le Kin Pathian! Roiinpuina le chôiindômna, sinthotheina hai hmurua ni ni, Nangma’n thil tinrêng ni siama, Ni’rchama om le a hring an ni,” an tia.