THUPHUANG 3 - PATHIAN LEKHABU IRTHIANG C.L. Bible (BSI)

Sardis Koiindang kuanga lekhathon

¹ “Sardis koiindanga vântîrtôn kuang hiang hin irziak roh: Hi thu hi Pathian irtha sari le ârsi neitu khan a insîr a ni. Ni sinthohai murdi kin hriat; thi chianin, hring irhming ni irput a ni!

² Harin lân, ni la inei a thi vâng vâng kha a thi hlet mân inhrât roh. Ni sintho rêng rêng hi ki Pathian mit tung mah ti kin hriat.

³ Khasikin irchutira ni om le ni inhriathai kha inhre maiin lân, zômin lân ni sualna ata irlet roh. Ni har no’n chu inru angin zuang ki ta, itika mo ni kuang ki izuang hrang inhre no chi ni.

⁴ Khannisianlân, Sardis-ah khan an puanhai innimloi, mi tômte nin om. Anni kha puan chek silin ki kuang om ngai an ti, khaanga tho inruk an ni ngai sikin.

⁵ An hnêtu ka chu khaang khan puan chekhai insiltir ni an ta, hringna lekhabua irthokin an irhming kha pai viat no ning. Ka Pa le vântîrtônhai makunga ki ta an ni tiin inpuang inlang ki ti.

⁶ “Irtha’n koiindanghai kuang thu a insîr hi mikuar nin neiin chu irngai roi, a ti,” tiin.

Filadelfia koiindang kuanga lekhathon

⁷ “Filadelfia koiindang vântîrtôn kuang hiang hin irziak roh: Hi thu hi mi irthiang tak le a dik tak, Davida châbi neitu, tûte ikhâr theiloi hrang inhong, tûte inhong theiloi hrang khârtu khan a insîr a ni.

⁸ Ni sintho murdi kin hriat: sinthotheina chînte ni nei, khan khomin ki thu ni poma, ki’rhming hnôl mak che ti kin hriat. Khasikin tûte khâr theiloi mikot kha ni makunga ki inhong a ni.

⁹ Irngai ta! Setana pâla mi senkhathai, Juda ni loia, milak tho Juda irtihai kha hong tîr ki ta, ni ke bula chubai nang hong inmûktir ki ti; khanchu khahai khan lung nang ki thung tih inhriat an ti.

¹⁰ Diarna thu nang ki pêk hi ni zôm sikin, irnêng chunga mihai fia hranga rammual pumpui chunga fiana zoro zuang tung hranga irthok khomin nang inzôk sa ki ti.

¹¹ Ki izuang lat hrang tâk kêng, ni thil nei kha dôn chianin lân, khanchu inhnêna lômman ni idong tum kha nang irchupui no nihai.

¹² An hnêtu kha chu ki Pathian biak ina chopuiin siam ki ta, kha hmuna khan om ta a ti. Khan, amaa khan ki Pathian irhming le, ki Pathian khopui Jerusalem thar, ki Pathian kuang ata irvâna irthoka zuang chum hrang irhming le ki’rhming thar irziak ki ti.

¹³ “Irtha’n koiindanghai kuang thu a insîr hi mikuar nei murdi’n chu irngai roi, a ti,” tiin.

Laodikei koiindang kuanga lekhathon

¹⁴ Laodikei koiindanga vântîrtôn kuang hiang hin irziak roh: “Hi thu hi Amen, inhriatpuitu diktak le iamom tak Pathian thilsiam bul khan a insîr a ni.

¹⁵ Ni sintho murdi kin hriat; a dâi khom ni mak che, a lum khom ni ual mak che. Ni idâi mani ni ilum mani ki nuam a ni!

¹⁶ Lum ual loi, dâi ual loiin, ni lum chêlchûl sikin ki bâi ata nang insâ pai ki ti.

¹⁷ Ki’rchong, sum ki nei, ite irsam ma ung ni tia, nang mi’rngaiinsia, inrenom, inriang, mitcho le korongboi ni nih ti ni inhriat loi a ni.

¹⁸ Khasikin nir chong theina hrangin rângachak meia irthiang tâk hai, ni korongboi ser an lang loina hranga ni sil hrang puan chek hai, ni hmu theina hranga mitna hloi hai ki kuang ircho hrangin nang ki ti.

¹⁹ Lung ki ithung ka chu ki hrila, ki zêm ngai, khasikin sathnem irngaiin lân, ni sualna ata irlet roh.

²⁰ Irngai ta! mikota ngîrin ki intôk hi, tukhomin ki’rhâi an hriata; mikot an hongin chu, a ina lûtin a kuang bu nêk ki ta, ama khomin ki kuang nêk a ti.

²¹ An hnêtu ka chu rêngtoihmun kôla intoitir ki ti; kei khomin kin hnêa ka Pa rêngtoihmun kôla ki itoi ang hin.

²² Irtha’n koiindanghai kuang thu a insîr hi mikuar nei murdi’n chu irngai roi, a ti” tiin.