THUPHUANG 21 - PATHIAN LEKHABU IRTHIANG C.L. Bible (BSI)

Irvân thar le Irnêng thar

¹ Khan, irvân thar le irnêng thar ki hmua; irvân masa le irnêng masa kha a boi tâka, tuikhanglian khom om ta mah.

² Khabana, Khopui Irthiang, Jerusalem thar kha, moiin a pasal don hranga a irvô ngai ang khan irzoi diamin Pathian kuang irvân ata zuang chumin ki hmua.

³ Rengtoihmuna irthokin hnukirhai inringtakin, “Atûn chu Pathian in kha mihriamhai laia a zuang om ta! Ama chu an kuang om a ta, anni chu a mihai ni an ti. Pathian ngei kha an kuang om a ta, an Pathian ni a ti.

⁴ “An mit ata mitrithi murdi huipai pehai a ti. Thina om ta no nia, beidongna hai, chapna hai le natna hai khom om ta no ni; thil miluihai kha a boi zoi ta,”, a iti kin hriat.

⁵ Khanchu, rêngtoihmuna toitu khan, “Atûn chu thil tinrêng ki siam inthar ta!” a tia. Khabana, “Irziak roh, hi thuhai hi iam a omin an idik kêng,” a ti saa.

⁶ Khan, ki kuang, “A’rzoi tâk! keima a maton tak le a hnungkhôn tak, a bul le a mong ki ni. Tuiinhrâlhaiin chu hringna tuikuang ata manboiin pe ki ti.

⁷ An hnêtuhaiin chu hihai hi ki kuang ata dong an ti: Keima an Pathian ni ki ta, annihai kha ki nâihai ni an ti.

⁸ Khannisianlân, mi thâidôphai, iamloihai, irdit saloi thohai, mi thathai, felloihai, dôi hmanghai, millim biakhai, milakhai murdi omna hrang hmun chu mei le kâta kâng dîl kha a ni; kha kha thi inhnina chu a ni,” a tia.

Jerusalem thar

⁹ Khan, berbu sari hremna hnungkhôn tak sari chôitu, vântîrtôn sarihai laia inkhat kha ki kuang a honga, “Hongin lân, Moi, Belrate dôngma hrang nang irhmutir ki ti,” a ni tia.

¹⁰ Khanchu, ama khan Irtha’n tâng irsâng lianpa sîpa a ni fepuia, Jerusalem, Khopui Irthiang, Pathian kuang irvân ata zuang chum kha a nin entira.

¹¹ Khopui khan Pathian roiinpuina a neia, lungmantam, Jasper lung angin, Krustal lung angin a vâra.

¹² Kulpui irsângtak a neia, kha kulpui khan mikot sômhleihni a neia, mikothai nghâkin vântîrtôn sômhleihni an oma. Mikothaia khan Israel nam sômhleihnihai irhming a chuanga.

¹³ Kha mikothai kha nisua tiang inthum a oma, hmâr tiang inthum a oma, sim tiang inthum a oma, nitâk tiang inthum an iom a ni.

¹⁴ Kulpui khan lungphûm sômhleihni a neia, kha lungphûmhaia khan Belrate tirtôn sômhleihnihai irhming a chuanga.

¹⁵ Khan, vântîrtôn ni chongpuitu khan khopui le a mikothai le kulpui irkhîna hrangin rângachak irkhîna khianghrol a chôia.

¹⁶ Khopui kha a dung le a khang ar ang chaka. Vântîrtônin a irkhîna khianghrol khan a’rkhia: a dung kilometar sânghni irza minli a ni, a khang le a’rsânglam khom a dung dôr a ni.

¹⁷ Vântîrtôn khan irkhîna khianghrol a ichôi dên leh khan kulpui kha a’rkhî nôka, a’rsânglam kha mûk irzakhat sômminli minli a ni.

¹⁸ A kulpui kha Jasper lunga siam a nia, a khopui kha rângachak irthiang, hlîmen ang dôra irthianga siam a ni.

¹⁹ Kulpui lungphûmhai kha lunghlu mantam chi tinrênga irvô a ni. Lungphûm masatak chu Jasper a nia, inhnina chu safir a nia, inthumna chu agate lung a nia, a minlina chu emerald lung a nia,

²⁰ a ringana chu sardonuk lung a nia, a kirukna chu karnelian lung a nia, a sarina chu kruso lung a nia, kiriatna chu berul lung a nia, kuakna chu topaz lung a nia, sômna chu krusopras lung a nia, sômhleikhatna chu tarkois lung a nia, sômhleihnina chu amethus lung a ni.

²¹ Mikot sômhleihnihai kha sailungvâr sômhleihni an nia, mikot tin kha sailungvâr inkhat senga siam a ni. Kha khopui tual kha chu rângachak irthiang hlîmen eninhlenthalthei anga hi a ni.

²² Khopui sûnga khan tempil hmu ma ung, Rengpa Pathian Itinrêngthothei le Belrate chu a tempil a ni sikin.

²³ Khopui êl hrangin misa le tha nang ta mah, Rengpa roiinpuina khan a êla, Belrate kha a meiser a ni.

²⁴ Khan a vâra khan nam tin om an ta; irnênga rênghaiin an roiinpuina chôiin lût an ti.

²⁵ Khopuia mikothai kha sûn sôtin irhongin om mai a ta, itiklai khom khâr ni no ni, zân reng om ual ta no ni.

²⁶ Khopui sûnga khan nam tin roiinpuina le chôiirsângna chôiin lût ni a ti.

²⁷ Khannisianlân, thil porinche ite hong lût thei no nia, thil intirom thohai le milak insîr uarhai lût thei no nihai; Belrate hringna bua irhming chuanghai vai kha Khopuia khan lût thei an ti.