THUPHUANG 20 - PATHIAN LEKHABU IRTHIANG C.L. Bible (BSI)

Kum sâng roirêlna

¹ Khan, vântîrtôn irvân ata zuang chuma khurmongboia châbi le thîrhrui lianpa a ichôi ki hmua.

² Dragon, rûlpui tar Diabola le Setana kha a chela, kum sângkhat hrangin a khit ta.

³ Khurmongboia khan a pai thâka, a khura kum sângkhat a hek mâka chu nam tin a huang loina hrangin a kal khak tâka. Kha hnung chu zoro sôtnote hrangin insua nôk ni a ti.

⁴ Khan, rêngtoihmunhai ki hmua, a chunga mi an toia, kha a toihai kuang khan roirêl thei hrangin irchamneina pêkin an om. Khabana, Jisua inhriatpuitu an nina sik le Pathian thu an inpuangna sika an lu an itan pehai irtha kha ki hmu sa. Anni khan sahrâng le a’rlim chubai mûk mahaia, sahrâng irsinsiana kha an michala mo an kuta mo se mahai. Khahai kha an hong hringa, kum sângkhat sûnga hrangin Krista leh roirêlin an om ta.

⁵ (Mithi danghai kha chu kum sângkhat a hek mâka chu la hring mahaia.) Ama kha thoinôkna masa tak a ni.

⁶ Kha thoinôkna masa taka changhai kha chu an vân a sa’n an irthiang a ni. Khahai chunga khan chu thi hnina khan ircham rêng nei ta mah; Pathian le Krista Ochaihai ni an ta, ama leh kum sângkhat roirêl an ti.

Setana inhnêa a omna

⁷ Kum sângkhat a hek tikin chu, Setana kha an tângna ata insua ni a ta,

⁸ khanchu rammual pumpuia nam tin irthekindarhai, Gog le Magog huanga, irdoinaa hong hruai bûm hrangin fe suak a ti. An tam lam chu tuikhangliana chiaiphoi dôr an ni.

⁹ Irnêng pumpuia an dâp zitin an hong kâia, mi irthianghai kul le an khopui indet tak kha an irhuala, khannisian irvân ata mei a zuang chuma, anni kha a kâng irhmanghai tâka.

¹⁰ Khanchu, annihai huangtu Diabola kha, sahrâng le deipu dol omnaa, kâta kâng meidîla khan an paihaia, kha khan a sûn a zânin hremna tuangin kumkhua’n om ta an ti.

Roirêlna hnungkhôn tak

¹¹ Khan, rêngtoihmun vâr lianpa le a chunga toitu kha ki hmua. A makung ata irnêng le irvân an rota an irhmang pat ta.

¹² Khanchu, mithihai, a lian a chînin, rêngtoihmun makunga ngîr ki hmua. Lekhabuhai an phara, lekhabu dang hringna lekhabu khom kha ar phar saa. Khanchu, mithihai kha an sintho seng lekhabua chuang ang takin roirêl pêkin an om ta.

¹³ Khanchu, tuikhanglian khan a sûnga mithi omhai kha an suaktira, thina le mithi khua khan an sûnga mithi omhai an insua saa, an rêngin an sintho ang sengin roirêl pêkin an om tâka.

¹⁴ Kha hnung chu thina le mithi khua kha meidîla an pai thâk ta. (Meidîl kha thi inhnina a ni).

¹⁵ Tukhom hringna lekhabua ar hming chuang loi ka chu meidîla khan an pai thâk sa ta.