THUPHUANG 2 - PATHIAN LEKHABU IRTHIANG C.L. Bible (BSI)

Efesi Koiindang kuanga lekhathon

¹ Efesi koiindanga vântîrtôn kuang hi ang hin irziak roh: “Hi thu hi a kut chang tianga ârsi sari chôia, rângachak meiser siana sarihai laia ar lôi maitu khan hi thu hi a insîr a ni.

² Ni sintho murdia ni sin irnak songzia hai le ni diarzia hai, mi sualhai nirngai theizia hai, ni tirtôn ni loia tirtôn dang irtihai kha ni fiaa, milak an nih ti nin hriat tâkzia hai kha kin hriat.

³ Ni diar tak taka, ki’rhming sikin ni tuanga ni sabei dong mah.

⁴ Khannisianlân, nang demna ki nei: atûn chu matona ang khan lung ni ni thung ta no sikin.

⁵ Idôr ten mo ni inrîl tâk ngaitua roh! Ni sualna ata irletin lân ni sintho masa kha tho nôk ta roh. Ni sualna ata nir let no’n chu zuang ki ta, ni meiser siana kha a hmun ata ki ithînpai hrang kêng.

⁶ Khannisianlân, hi hi ni satna chu a ni: Nikola pâlhai sintho kha ki hnôl lam ang takin ni hnôl sikin.

⁷ “Irtha’n koiindanghai kuanga thu a insîr hi mikuar nei murdi’n chu irngai roi! An hnêtu ka chu Pathian Irhuana hringna thing ra infatir ki ti,” tiin.

Smurna Koiindang kuanga lekhathon

⁸ “Smurna koiindanga vântîrtôn kuang hiang hin irziak roh: Hi thu hi a maton tak le a hnungkhôn tak, a thia hong hring nôk taktu khan a insîr a ni.

⁹ Ni dengtheizia le nin riangzia kin hriat, khannisianlân, nir chong, Juda tak ni loia, Setana pâla mi Juda irtihai nang insîrinsiatzia kha kin hriat!

¹⁰ Ni tuang hranghai hi ite chi no roh. Irngai ta! nin laia mi senkhat intângna ina khumin Setana’n nangni a ifia hrang a ni. Khante, sûn sôm dengthei nin ti. Thina dênin keimaa iamomin om roh, khanchu inhnêna lômmanin hringna rêng lukhum nang pe ki ti.

¹¹ “Irtha’n koiindanghai kuang thu a insîr hi mikuar nei murdi’n chu irngai roi! An hnêtu ka chu thina inhnina khan ite nangni lo no ni, a ti,” tiin.

Pergamos koiindang kuanga lekhathon

¹² Pergamos koiindang vântîrtôn kuang hiang hin irziak roh: “Hi thu hi khandai bê hni nei ngaihtak neitu khan a insîr a ni.

¹³ Ni omna hmun Setana toihmun omna kha kin hriat. Ki’rhming nin tûk ngita, ki inhriatpuitu iamom tak Antipas, Setana omnaa nin laia an that lai khoma khan ni iamna hi ma mak che.

¹⁴ Khannisianlân, nang demna ki nei viat: nin laia mi senkhatin Balaama thu irchutirna an pom sikin. Kha pa khan millim biakna thil an ifâkna hrangin le irditna porinche an songna hrangin Balaka kha Israel mihai suala hruai irhmang dân a irchutir a ni.

¹⁵ Khaang dênin Nikola mihai irchutirna thu pom senkhat ni ompui sa.

¹⁶ Khasikin ni sualna ata irlet roh! Ni’rlet no’n chu ni kuang zuang ki ta, ki bâia khandai khan anni kha ki zuang idoi hrang kêng.

¹⁷ “Irtha’n koiindanghai kuang thu a insîr hi mikuar nei murdi’n irngai roi! An hnêtu ka chu mana irthup kha pe ki ta, lung ngoi a chunga irhming thar irziak, a dongtu ti no’n chu tûte’n an inhriat ngai loi kha pe sa ki ti, a ti,” tiin.

Thuatira koiindang kuanga lekhathon

¹⁸ Thuatira Koiindanga vântîrtôn kuang hiang hin irziak roh: “Hi thu hi Pathian Nâipa, a mit meichok anga om, a kezaphahai dâr irtêk anga om khan a insîr a ni.

¹⁹ Ni sinthohai murdi kin hriat, lungthungna ni neizia hai, ni sinthozia hai le ni dorôizia hai kha. Atûna ni sinthohai hi chu matona nêkin a lûminna ual ti khom kin hriat.

²⁰ Khannisianlân, nang demna ki nei a ni, nupang Jezebeli deipu irtinu kha nir ngai thei sikin. Ama khan ki suakhai kha irdit le millim biakna thil fâk irchutirin a hruai irhmang ngai.

²¹ A sualna ata a’rletna hrangin zoro ki pêka, khannisian, irlet nuam mah.

²² Khasikin natna zâlhmuna ki pai ta, a uire ngaihai khom kha an irlet no’n chu denginthei irkhêl taka pai sa ki ti.

²³ A zui ngaihai khom kha that pe ki ta, khanchu keima hi lungrîl le ngaituana inhre ngaitu ki nih ti koiindanghai murdi’n inhria an ti. Nin rêngin nin sintho ang sengin nangni pe ki ti.

²⁴ “Khannisianlân, nangni Thuatira kho mi, hi irchutirna saloi pom loia, ‘Setana thu irthup inthûk’ an iti irchu kakai chunga chu puakrik dang ite nangni bôk pe no ning ki iti a ni.

²⁵ Nin inei sai kha chu ki zuang mâka chu intûk ngit roi.

^26-28 An hnêtu kakai le a mong dêna ki nuamlam sintuhai chu, ka Pa kuanga irthoka ki hmu ang taka irchamneina kha pe ki ti; nam tin chunga thîr khianghrol leh roirêl a ta, pilbêl anga intôk khoi chit hrangin irchamneina pe sa ki ti. Sikhovâr khom pe sa ki ti.

²⁹ “Irtha’n koiindanghai kuang thu a insîr hi mikuar nei murdi’n chu irngai roi, a ti,” tiin.