THUPHUANG 14 - PATHIAN LEKHABU IRTHIANG C.L. Bible (BSI)

Belrate le a mihai

¹ Khan ki hong ena, Belrate kha Zion Tânga, mi 144,000 (Nuaikhat sîngminli sângminli) an michala ar hming le a Pa irhming irziakhai leh ngîrin ki hmua.

² Irvâna irthokin hnukirhai, tuitâk irhai le a sâna khonri inring angin kin hriat; Serânda âthaiin an Serânda an i-ât irhai angin kin hriat.

³ Rengtoihmun le thilhring minlihai le upahai makunga khan mi nuaikhat sîngminli le sângminli kha an ngîra, hla thar, anni vai irchu thei kha, an saka. Rammuala mi murdi laia kha mihai vai kha inhlan an ni.

⁴ Kha mihai kha nupang leh porincheloi, a’rthiangliai an ni. Belrate fena tina an zui ngai. Pathian le Belrate kuang inhlan masa tak ni hranga rammuala mi murdihai laia irthoka irtan an ni.

⁵ Milak hril viat ngai mahai; sêlnaboi an ni.

Vântîrtôn inthumhai

⁶ Khan, irnênga mi murdi zât tina mihai, chi tina mihai, chong tina mihai le nam tina mihai kuang tânginsam hrang Thurchi Sa nei vântîrtôn dang irvânlaizôla vuang ki hmua.

⁷ Ama khan hnukirhai inring takin, “Mihriamhai roirêl zoro a hong tung tâk sikin Pathian chu chi unglân, chôiindôm roi! Irvân, irnêng tuikhanglian le tuihnâr hai siamtu kha chubai mûk roi!” a tia.

⁸ Vântîrtôn inhnina khan vântîrtôn inkhatna kha a hong zuia, “Babulon kho roiinpui, a hurna uain hrât nam tin in-intir ngainu kha an rîl ta! an rîl ta!” a tia.

⁹ Khan, vântîrtôn inthumna khan vântîrtôn inkhatna le inhnina a hong zuia, hnukirhai inring takin, “Tukhom sahrâng le a’rlim chubai mûk le a michala mani, an kuta mani a’rsinsiana chuang murdi chu;

¹⁰ kha mi tak khan Pathian ningmurna uain, a ningmurna khilâta a isung insip kha in a ti. Vântîrtôn irthianghai leh Belrate makunga mei le kâta dengintheiin om a ti.

¹¹ Kha mihai dengintheina meikhu kha Kumtuangin khu mai a ta, sahrâng le a’rlim chubai mûkhai le ar hming indangna neihai ta hrangin chu, a sûn a zânin zôkna om pe no ni,” a tia.

¹² Hi hin Pathian mihai, a thupêk zôma Jisua ta hranga iamomhai chu tuangdiarna an inei a ni.

¹³ Khanchu, irvâna irthokin hnukirhaiin, “Hi hi irziak roh: Atûna irthokin Rengpaa thihai chu an vân a sa,” a iti kin hriat. Irtha khan, “A ni tak tak! An sinsôlna irthokin irngam ta an ti; an sinthôna ra khan a zui sikin,” tiin a sâma.

Irnêng bu ât zoro

¹⁴ Khan, ki hong ena, sûm chek hlang ki hmua. Kha sûm chunga khan mihriam ang taka om hi, rângachak rênglukhum khuma, kôite ngaihtak chôiin a toia.

¹⁵ Khan, vântîrtôn dang Pathian biak ina irthokin a hong suaka, sûm chunga toitu kuanga khan hnukirhai inring takin, “Ni kôite kha hmangin lân, bu kha ât roh; a ât zoro tâk kêng; irnêng buhai kha an hmin tâk sikin!” a tia.

¹⁶ Khanchu, sûm chunga toitu khan a kôite kha irnênga a vaia, irnêng buhai kha ât a ni ta.

¹⁷ Khan, vântîrtôn dang irvâna Pathian biak in ata a hong suak nôka, ama khom khan kôite ngaihtak a chôi sa.

¹⁸ Vântîrtôn dang, mei chunga ircham neitu, maichâma irthokin a hong suaka. Kôite ngaihtak chôitu kuang khan hnukirhai inring takin, “Ni kôite kha hmangin lân, irnênga grep ra khu zu ât roh, an hmin tâk sikin!” a tia.

¹⁹ Khaang khan, vântîrtôn khan a kôite kha irnênga a vaia, irnênga grep ra kha a âta, Pathian ningmurna grep sômna khurpuia khan a thun tâka.

²⁰ Khanchu, khopui pên tianga grep sômna khura grep kha a sôma, kha khur ata kha thisen a hong suaka, kilometar irzathum seiin a luang suaka, metar inhni vêl an thûka.