THUPHUANG 10 - PATHIAN LEKHABU IRTHIANG C.L. Bible (BSI)

Vântîrtôn le lekhabu irzuat tê

¹ Khan, vântîrtôn hrât tak dang irvân ata zuang chum ki hmua. Sûmin ar tuama, a lua sumrisâng ar zâma, a hmâi kha misa angin a oma, a kehai kha mei chopui angin a om.

² A kuta khan lekhabu irzuat tê phar sai a chôia, a ke chang tiang tuikhanglian a sira, vei tiang muang a sira,

³ kâmkeibaknei inhrâm ang dôrin hnukirhai inring takin a khêka. A khêk zoiin chu khonri sarihai khan inring takin an dona.

⁴ Kha khonri sarihai khan an rôl an insua zoi le chu irziak ki tuma. Khannisianlân, “Khonri sarihai chong kha ip chian roh, irziak no roh,” tiin irvâna irthokin hnukirhai kin hriata.

⁵ Khan, vântîrtôn tuikhanglian le tânga ngîr ki ihmu khan a kut chang tiang irvân tiang a phara,

⁶ irvân hai, irnêng hai, tuikhanglian hai le a sûnga om tinrênghai siamtu Pathian, kumtuanga hring mai irhminga khomâk irsâmin, “Zoro om ta no ni,

⁷ khannisianlân, vântîrtôn a sarina khan a bekul a tum tena chu Pathianin a thu’rthup kha irkiptir ta a ti, a suak, deipuhai kuang a inpuang ang khan,” a tia.

⁸ Khanchu, irvân irthoka hnukirhai kin hriatin a ni chongpui tâka, “Tuikhanglian le tânga ngîr vântîrtôn kuang va fe’n lân, a kuta lekhabu irzuat phar sai so va la roh,” a tia.

⁹ Vântîrtôn kuang ki va fea, lekhabu irzuat tê kha ki nghia. Ama khan ki kuang, “La’nlân, fa roh: ni sûnga khâ a ta, ni bâia chu khuaihlutui ang dôrin thum a ti,” a tia.

¹⁰ Khanchu, vântîrtôn kuta irthokin lekhabu irzuat tê kha ki lâka, ki fâka; ki bâia chu khuaihlutui ang dôrin a thuma. Khannisianlân, kin vol zoiin chu ki sûnga chu a khâ zap ta.

¹¹ Khan, ki kuang “Mi tamtakhai, nam tamtakhai; chong tamtakhai le rêng tamtakhai chungchâng thu ni la insîr nôk hrang kêng,” an tia.