THUHRILTU 9 - PATHIAN LEKHABU IRTHIANG C.L. Bible (BSI)

Hringna tamtak irang loizia

¹ Hihai murdi hi hmusuak hrangin a sân ki milungin ki’rveia, mi felhai le mi vârhai le, an sinthohai chu Pathian kuta om a nia, khannisian lungthungna a ni le irkhôkmâkna a nih ti mihriamin inhre mahai, an maton a ni vinga.

² Thil tinrêng mongna chu hmunkhat a ni, mi felhai le mi pualoihai, mi sahai le mi saloihai, mi irthianghai le mi irthiangloihai, thilinhlan ngaituhai le inhlan ngailoituhai mongna chu hmunkhat a ni. Mi sahai chunga a itung ang dên chu mi sual chunga khom a tunga, khomâk irsâmtuhai chunga a tung ang dênin irsâm loituhai chunga khom a tunga.

³ Hi hi a ni, misa hnuaia sintho murdi laia sin saloi chu, mi murdi chunga mongna hmunkhata tung hi, mihriam nâihai lungrîl chu sin saloia sip a nia, an hring sûngin an milunga invêtna a oma, kha hnunga mithi kuang an fe tâka.

⁴ Khan, mi tukhom mihriamhai kâra la lêngtu ta hrangin chu sabeina a la oma, kâmkeibaknei thi sai nêkin chu ui hring chu a sa ual.

⁵ Mihringin chu la thi hrang an nih ti an inhriata, khannisian mithihaiin chu ite inhre ta ngai mahaia, lômman khom nei ta ngai mahai; an irnghilpai ving tâk a ni.

⁶ An lungkhamnahai, an hmumâknahai, an hnarsânahai khom chu a boi ving tâka; misa hnuaia sin thoa omhai hin dongtum tinrêng nei ta mahai.

⁷ Fe’n lân, lôm takin ni bai fa ro, ni uain chu milung raifân takin in ro; ni sinthohai chu Pathianin a pom tâk sikin.

⁸ Ni tukrivohai chu fâi mai sianlân, ni lu khom inthir ngai no ri se.

⁹ Misa hnuaia Pathianin nang a ipêk hringnun chanlamboi ni hmang sûng hin ni dôngma ni lunginkham leh khan raifân takin om roh. Kha kha misa hnuaia ni sinsôlna ra le ni hring sûnga ni ta hranga inkunga om chu a ni.

¹⁰ Ni kutin sintho a ihmu kai chu ni thei dôrin tho’n lân, ni fena hrang thâna khan chu vârna mani, inhriatna mani, sin thôna mani le ngaituana mani khom a om ta no hrang sikin.

¹¹ Khan, ki thîr nôka, misa hnuaia intânirsiatna chu chaninranghai hrang vai ni maka, irdoina khom chu a hrâthai ta hrang vai ni ual ma; bâi khom chu mi vârhai ta hrang vai ni maka, irchongna khom hi inhriatthiamna nei mihai ta hrang vai ni ma, inditna khom hi mi thiamhai ta hrang vai ni mah ti ki hmua, khannisian zoro’nchum chu an rênga kuanga a itung hi kêng a ini.

¹² Khan, mihriamin zoro chu itika mo a hong tung hrang ti inhre viat mah. Ngahai chu lêna khum le, vahai chu chânga khit angin, mihriamhai khom zoro saloiin irningloiin a khumhai ngai.

Hrâtna nêkin vârna a sa ual

¹³ Misa hnuaia khan hianga vârna hi ki hmua, keima hrangin a sân roiinpuiin an lang.

¹⁴ Khopui chînte, a sûnga mipui tômte om hi a oma; rêng roiinpui tak hin a hong doia, ar huala, kul roiinpui tak a siam tâka.

¹⁵ Khan, a sûnga khan nâi vâr inriangtak hi a oma, a vârna’n khopui kha a saninzôk tâka; khannisian kha inriang kha tukhomin inhre ta mahaia.

¹⁶ Mi inriang vârna chu hmumâka omin, a chonghai irngaisak ni no khom sianlân, keiin chu “Hrâtna nêkin vârna hi a sa ual,” ki iti tâk a ni.

¹⁷ Invêthai roirêlna hmuna roirêltu inringtaka khêk nêkin chu, mi vârin dâizana a ihrilhai irngai chu a sa ual.

¹⁸ Vârna chu irdoina râltukfam nêkin a sa uala; khannisian, mi sual inkhatin thil sa tamtak an siattir thei.