THUHRILTU 7 - PATHIAN LEKHABU IRTHIANG C.L. Bible (BSI)

Hringnun chungchâng suina

¹ Irhming sa chu sahriak hlutak nêkin a sa uala; suak nî nêkin thi nî hi a sa ual.

² Hruaithena ina fe nêkin chu lusûnna ina fe chu a sa ual; kha kha mi tin itong hrang chu a ni sikin, mi hringin a milunga kha kha inhre mai ri se.

³ Innui nêkin chardong khom chu a sa ual, chardong hmêl hin milung a siam insa ngai sikin.

⁴ Mi vâr milung chu lusûn ina a om ngaia, khannisian invêt milung chu raifânna ina a om ngai.

⁵ Intohai hla sak irngai nêkin chu, mi vâr irchûna inhriat chu a sa ual.

⁶ Invêt innui chu, ilhling meia ei hâla a’rhâi phet phet ti ang hi a ni; ite omzia nei ma.

⁷ Mi vârin mi senkhat a huang tena chu, ama chu invêt anga om chu a nia. Khaangin fâkinrûkna hin lungrîl an siat.

⁸ Thil chu a’rphutna nêkin a mongna chu a sa uala; milunga za’rngaithei mi chu, milunga lârirpâk nêkin a sa ual.

⁹ Ni ningmur chu indâipai ro, ningmurna hi invêthai rôpsuama kêng a om ngai.

¹⁰ “Tûnlai zoro nêk hin tianlai zorohai kha itho sika sa ual ma ni?” ti no ro, kha irdonna kha vârna irthoka ni mah.

¹¹ Vârna hi irchon anga sa a nia, a ni, mi vârhaiin chu irchon tamtak nei an ti.

¹² Tangka chu irhrungna a ini angin, vârna khom hi irhrungna a nia; inhriatna satna chu vârna neitu hringna chu a sansuak pe a ni.

¹³ Pathian sintho hi ngaitua ta; a kôia a isiam tâk chu tu’n mo intûn thei hrang?

¹⁴ Zoro sahaia chu raifânin omin lân, zoro saloihai chu ngaitua ro; Pathianin raifânnahai le chardongnahai a zuang tîr ngaia, khasikin mi’n a sûnmaton tianga thil chu ite inhre ngai mah.

¹⁵ Hi ki hring sûng chanlamboi nikhuahai hin; mi fel thi lat le, mi pualoi a pualoinaa sôttak hring hi ki hmua.

¹⁶ Khasikin, fel hraiin om no’n lân, vâr hrai khomin om sa no ro; itho mo ni bingin te irthat ni ta?

¹⁷ Pualoi hrai khomin om no’n lân, invêt hrai khomin om sa no ro, itho mo ni zoro a tung mânin te thi ni ta?

¹⁸ Hi ni ichel khak hi a sa a ni, khataka irthok khan ni kut khom la kîr no ro; Pathian chituhaiin nang la hong suaksan ving an ta.

¹⁹ Khopui sûnga roirêltu sômhai nêk khomin vârnain mi vâr chu an hrâttir ual ngai.

²⁰ Irnêng chunga hin diktaka sin sa thoa, inchâi ngailoi hi om mahai.

²¹ Khanchu, mi thuhril murdi hi ngaisak ngai no ro, khano’nchu ni siahlo’n khua nang sâl an ti,

²² nang ngei khomin khaang tak khan mi danghai khua ni lei sâlhai ti ni milungin nin hriat sikin.

²³ Hihai murdi hi ki vârna chu hmangin ki lei fia tâka, “Vâr ta ki ti,” ki tia; khannisian, keimaa irthokin hlatak a ni.

²⁴ Hringnun omzia hi tu’n mo hmu suak thei a ta? Eini ta hrangin chu a sân an thûka, inhriatthiam intak tak khom chu a ni.

²⁵ Khanchu vârna dik chu imo a ini, ti hmusuak hrangin a sân ki suia, thil tinrêng a omna sanhai khom chu hmusuak ki tuma. Khante, imo ki hmu suaka? Ki ihmu suak chu, hi hi a ni: pualoia om hi sa maka; lusiat anga om khom hi invêtna a ni tihai hi a ni.

²⁶ Khanchu, thil inkhat thina nêka kha ual chu ki hmua, kha kha nupang, a milung chu châng anga om le lênhai anga, a kuthai khom chu minâng anga om mi chu a ni. Mihriam, Pathian lungdo anga omtu chu zôk thei a ta, khannisian, kha nu khan mi sualhai chu chelhai a ti.

²⁷ Thuhriltu khan, “Irngai ta, hi hi ki sui za zâma ama chu ki hmusuak ta.

²⁸ A dang khom hmusuak ki tuma, khannisian hmu thei ma unga, khanchu pasal sângkhat laia pasal inkhat chu a dik hi ki hmua, khannisian nupanga chu inkhat lua hmu ma ung.

²⁹ Khanchu hi vai hi ki hmusuaka, Pathianin chu mihriam hi dik hrangin a siama, khannisian mihriamhai chu lampui kôi tamtaka an pêt tâka,” a tia.