THUHRILTU 4 - PATHIAN LEKHABU IRTHIANG C.L. Bible (BSI)

¹ Khanchu, ki hei thîra, misa hnuaia dengtheina murdi chu ki hmua; khanchu irngai ta, dengtheia omhai mitrithi khom chu ki hmu saa; lungngam saktu hrang rêng rêng nei mahaia. Dengintheitirtuhai tiang khan sinthotheina chu a om sikin, anni chu tukhomin changpui mahaia.

² Khasikin, mi hring la damhai nêkin lei thi tâkhai hi a hoi pehai ual hrangin ki bêa.

³ Khannisian khahai nêka vânsa ual chu, la irzir loihai, rammuala pualoina la hmu viat loihai hi an ni.

⁴ Khanchu, itho sika mihai hin hlochukna hrangin a sâna sin an itho; hi khom hi tualbômhai hnarsâna sika a nih ti kin hriat tâka; khannisian hi khom hi chanlamboi le a korong a ni.

⁵ Mi senkhatin, “Mi’nvêtin chu a kut a thepa, ama taksa chu a fâka,” an tia.

⁶ A dik khom a ni theia, khannisian itiklai khom lêt raraka kut inhni insêp le chanlamboi irzûl mai nêkin chu, lungchuk taka a tômte nei chu a sa ual.

⁷ Khanchu, ki thîr nôka, misa hnuaia hin chanlamboi chu ki hmu nôka.

⁸ Mi inkhat a bing doka om hi a oma, nâi le te khom nei maka, urêng khom nei sa maka, khannisian sin tho maiin a oma, irchon a ineia khan a mit irzukna chu hek thei maka; khante tu ta hrangin mo kha dôra sôla, nunkhonhoina tinrêng a inchân? Hi khom hi chanlamboi a nia, dengthei taka hringnun hmang hi a ni.

⁹ Mi inkhat nêkin inhni chu a sa ual, sin an tho suam theina sikin.

¹⁰ Inkhat a’rtet khomin, inkhat khan a rual chu kaithoi a ta; a bing doka om mi kha chu a chung a rik, a’rtet khomin kaithoitu hrang a nei no sikin.

¹¹ Khabana, a dâi khomin, mi inhni an zâl suama ni’n chu lum takin an om theia, khannisian mi inkhat chu a bingin itin mo lum thei a ta?

¹² Mi inkhat chu inhnê khomin a om thei, khannisian mi inhniin chu an irsansuak thei. Hrui inthum a inhrual chu oltenga irtantir thei ni ma.

^13-14 Mi inriangtak khom a rama rêng a chang theia, intângna in ata rêngtoihmuna khom a kâi lik thei, khannisian a tar hnunga lungvârsaknahai pomna châng khom inhre loia an toa ni’n chu, ama chu ruatharte inriang vârna nei nêka a sa ualna ite om hliak ual mah.

¹⁵ Hi rammuala mi murdihai chungchâng thu hi ki ngaituaa, khanchu an laia kho hmuna mani chu ruatharte inkhat hi rêng irthûla toi hrang hi a om ti kin hriat suak tâka.

¹⁶ Rêngin roirêlna sûnga mi om zât hrang chu tenthei ni ngai maka; khan ama chu a fe tika, a sinthohai sikin tukhom raifân om ual no nihai. Hi khom hi chanlamboi, a korong irzûl ang chu a ni.