THUHRILTU 11 - PATHIAN LEKHABU IRTHIANG C.L. Bible (BSI)

Mi vâr tho dân

¹ Ni sum chu ram danga semin lân, sûn tamtak hnunga chu a lâp siam ni ti.

² Ni inpunghai hrang chu hmun dang danga le hmun tamtaka semin lân, hnuai chunga hin i ang siatna mo a hong itung hrang ti nin hriat no sikin.

³ Sûmhai chu rotui a sip tena, irnêng chunga rotui an bunthâk ngaia, thing chu sim tiang mani hmâr tiang mani a kiakin chu, a kiakna hmuna khan thing chu om a ti.

⁴ Phâivua nghâktu’n chu chîmu tû no nia, sûmhai thîrtu khomin ât ngai no ni.

⁵ Phâivua lampui ni inhriat loi angin le, nupang nâi vongtu sula hin itin mo ruhai chu an irfûk ti ni inhriat loi, Pathian itinrêng siampu, sinthohai chu inhre no chi ni.

⁶ Chîmu chu zîng tiang tû’n lân, khohloi tiang khom ni kut chu ôl no ri se; a kho nia ni itu kha mo mông insa ual hrang, ti nin hriat no sikin.

⁷ Sûn khovâr hoitak hmang theia om hi a isa a ni.

⁸ A sôt le a bong thu chu, thu dang ni sianlân, ni hring sûng chu raifân takin hmang ro; khannisian la thi hrang ni nih ti hi inhre mai ro, ni hring sûng kumhai nêkin thinaa om chu sôttak la ni a ta; ni thi hnung lakin ite tho thei ta no chi ni.

Vânglai kuanga irdon

⁹ O vânglai, ni vânglai nikhuahai hin raifân takin hmang ro, ni vânglai nikhuahaia khan ni milung chu raifânin om sianlân, ni itho nuamhai chu tho’n lân, ni milung irzukhai chu tho ro, khannisian, ni sintho murdihai chunga Pathianin roi la rêl a ti, ti inhre mai roh.

¹⁰ Khan, ni milunga chardongna chu khâipaiin lân, ni taksa irthoka thil saloi khom khâipai sa ro, vânglaiin sôttak ni om no hrang sikin.