RUTHI 4 - PATHIAN LEKHABU IRTHIANG C.L. Bible (BSI)

Boaza’n Ruthi dôngma’n a nei

¹ Boaza chu roirêlna hmun, dâi mikota a hong fea, a toia. An urêng irkaipui tak chungchâng thu Boaza’n a ihril kha a honga. Boaza’n, “Ki rualpa, hi tiang hongin lân, hong toi ta,” a tia. Ama chu a va fea, a toi tâka.

² Boaza’n kha khuaa mi upa sômkhat a koi bûmhaia, an kuang, “Hitaka hin toi khôm u ta,” a tia; khanchu an toi tâka.

³ An irkaipui irnai takpa kuang, “Moab ram ata hong kîr, Naomi’n ei urêngpa Elimelek ram kha zuar a nuama;

⁴ nangma hi inhril masa zât ni nih ti kin hriata, ni’rtan nuama ni’n chu hi upahai inhriata hin irtan roh; ni’rtan nuam no’n chu nin hril ro; nangma ti no chu tûte a’rtan zât om mahai; khan, ni’rtan thei no’n chu kei hi a’rtanrua ki ni,” a tia. Ama’n, “Irtan ki ti,” a tia.

⁵ Boaza’n, “Naomi kut ata ram ni’rchôk nî khan meithâi Moab mi, Ruthi ni inei sa hrang a om maia, a’rchon luatu hrang an om zêl theina hrangin,” a tia.

⁶ An urêng irkaipuipain, “Keima ta hrangin chu thei no ning, anino’nchu keima irchon luana hrang tiang inbuaina ki ti, irtan theitu ki nina chu nangma’n chang ta ro; keima’n chu ki irtan thei ta loi a ni hi,” a tia.

⁷ Tianlaia Israelhai laia thil an irchôkin mo an irthûlin mo an namindetna hrangin a zuartu’n a kekok khek a ta, ar chôktu kuang a pêk ngai. Hi hi Israelhai laia thil namindet dân chu a ni.

⁸ An urêng irkaipuipa khan Boaza kuang, “Nangma’n ni ta hrangin ircho ta ro,” tiin a kekok chu a kheka a pêk tâka.

⁹ Boaza’n upahai le mipui murdihai kuang, “A vuan sûn hin Elimelek thil nei murdi le Kiliona le Mahlona thil nei murdi chu Naomi kut ata ki’rchôk tah ti inhriatpuituhai nin ni.

¹⁰ Khabana, mithi chu a’rhming a om maina hranga ar chon luatu siam pe hrang le mithi chu a urênghai laia le a omna mikota ar hming ar hmang loina hrangin, Moab meithâi, Mahlona dôngma chu ki dôngma ni hrangin ki nei ta; a vuan hin nangnihai hi an hriatpuituhai nin ni,” a tia.

¹¹ Khanchu, dâi mikota mipui murdihai le upahaiin, “An hriatpuituhai kin ni. Ni ina nupang hong lût chu Israel in sûngkua indingtu inhni Rakili le Leaii angin Rengpa’n siam ri se. Nang khom, hi Efrata nam laia hin mi roiinpui tak nin lân, Bethlehem-a irhming inthang takin om roh.

¹² Rengpa’n hi nupang ata irchi a la hong isiam pe hrang sika hin, ni in sûngkua chu Juda’n Tamari nupang ata nâi a inei Pereza in sûngkua angin hong ni ri se,” an tia.

Boaza le a’rchihai

¹³ Khanchu Boaza’n Ruthi chu dôngma hrangin a hruaia, an omsuam tâka. Rengpa’n Ruthi chu nâi an vongtira, nâipasal a nei tâka.

¹⁴ Khataka nupanghaiin Naomi kuang, “Nangma nang enkol hrangtupa nang inneitirtu Rengpa chu inpâkin om ri se. Hi nâipang hi Israel rama hong inlal ri se!

¹⁵ ama chu ni ta hranga hringna inthar nôktu le ni tar tianga nang a donsuitu la hong ni a ta, ni moinu nang lungthungtu hi nâipasal sari nêka tama hlu ual, ama chu nang a nei pe tâk a ni,” an tia.

¹⁶ Naomi’n nâite kha a lâka, a rôpsuama a poma, a donsui tâka,

¹⁷ Khanchu, a tualbôm nupanghaiin, nâite irhming an hong phua tâka, “Naomi’n nâipasal a nei ta,” ti’n a’rhminga Obeda an phuaa; ama chu Davida pu Jesaia pa a hong ni ta.

¹⁸ Hi hi Pereza irchi hong omdân chu an ni; Pereza chu Hezrona pa a ni.

¹⁹ Hezrona chu Rama pa a ni, Rama chu Aminadaba pa a ni.

²⁰ Aminadaba chu Nasona pa a ni, Nasona chu Salmona pa a ni.

²¹ Salmona chu Boaza pa a ni, Boaza chu Obeda pa a ni.

²² Obeda chu Jesaia pa a ni, Jesaia chu Davida pa a ni.