RUTHI 2 - PATHIAN LEKHABU IRTHIANG C.L. Bible (BSI)

Boaza loia Ruthi sintho a fe

¹ Naomi khan a pasal Elimelek urêng irnaipui, a’rhming Boaza, mi neinung tak a neia.

² Moab mi Ruthi’n Naomi kuang, “Loi tiang va fe ki ta, faôi va zong ki ti, ni lei inrentu chu va hmu ngêt ki ti,” a tia. Naomi’n, “Fe ro ba, ki nâinu,” a tia.

³ Khanchu a fea, bu âttuhai lâksel chu a va zong irkhôm tâka. Elimelek urêng Boaza loi khera khan a va fe tâka.

⁴ Boaza khom Bethlehem rengata a hong tunga, bu âttuhai kuang, “Rengpa nin kuang om ri se,” a tia. “Rengpa’n sat nang vur ri se,” tiin an thuana.

⁵ Boaza’n a siahlo, bu âttuhai chunga hruaitu kuang, “Hi hi kho tianga nupang ma ni?” a tia.

⁶ A siahlo, bu âttuhai chunga hruaitu’n, “Hi mi hi Moab nupang, Moab ram ata Naomi leh hong kha a ni.

⁷ ‘Bu âttuhai hnung zuiin, an bu irkhôm zoi mihlia zong irvai thiai ki ti,’ tiin a ni ngêna; zoro sôtloite ichua a’rngam ti no chu zîng rengata atûn ten hin a la izong irkhôm mai a ni,” tiin a sâma.

⁸ Khan Boaza’n Ruthi kuang, “Ki nâinu, irngai ro. Loi danga chu faôi zong hrangin fe no’n lân, hi hmun ata hmun danga irson no roh, ki siahlo dôngmatehai kuanga hin om maiin lân;

⁹ kho tiang mo bu an ât en vêlin lân, dôngmatehai hi zuihai mai roh. Ruathartehaiin ite nang an ti loina hrangin ki hrilhai ta; ni tui an hrâlin chu tuibêla ruathartehai tui chôi sai kha va in ngai ro,” a tia.

¹⁰ Khanchu, Ruthi chu irnênga a kûna, “Kei nam dang mi hi ni nin hriat nuama, hiang taka lung ni ni inkham hi, itina ma ni tâk?,” a tia.

¹¹ Boaza’n hiang hin a sâma, “Ni pasal a thi rengata ni tarpi chunga ni sintho murdi mi’n an nin hrila; ni pahai, ni nuhai, le ni’rsiangna ramhai mâksana, mi ni la inhriat ngai loihai laia om hranga ni hong dânhai ti khom mi’n an nin hril zit a ni.

¹² Rengpa’n ni sinthôna man nang thuan sianlân; Rengpa, Israelhai Pathian, irsûnghualna hranga a mithazâr hnuaia, a zuang inkhumin chu, ni satna man nang pe ok ri se,” a tia.

¹³ Ruthi’n, “Ka pu, nangin ni nin ren sikin ki’rtha a’rngam ta. Ni siahlo dôngmatehai laia mi ni no khom inlân, ni siahlonu hi satakin ni ni ichongpui hi ki ta hrangin lunginkhamtu liantak ni ni,” a tia.

¹⁴ Khanchu, bunêk zoro laiin Boaza’n Ruthi kuang, “Hitaka hin hongin lân, baihai hi hong fa ro, bai tanghai hi uain thûra inchie sa ro,” a tia. Bu âttuhai kôla a toia; Boaza’n changpêr a lei pêka, khop telin a fâka, a khop hnungin a fâk mihlia a la nei ok.

¹⁵ Khan, faôi zong irfuang hrangin a’rthok nôkin chu, Boaza’n a ruathartehai kuang, “Bumût laia bu khom la sianlân hal no roi.

¹⁶ A têl lai ata bupâr khom kaidok pe unglân, mâksan rak unglân hrût ri se, hal viat no roi,” tiin chong a bêhaia.

¹⁷ Ruthi chu khohloi dênin faôi a zong irkhôma, a irkhômhai kha an chîla, barli epna khat vêl a ni.

¹⁸ A bu zong irkhôm kha kho sûng tiang a pêla, a tarpi chu an entira, bai a fâk zoiloi khom a kêlsuaa, a tarpi a pêka.

¹⁹ A tarpi’n a kuang, “A vuan sûn hin kho tianga faôi mo ni izong irkhôm? Tu loia mo ni va isin? Nang a lei inrentu chu satvurin om ri se,” a tia. Ruthi’n a tarpi kuang a va sinna chu, hiang hin a hrila, “A vuan sûna sin ki va ithônapa irhming chu Boaza a ni,” a tia.

²⁰ Naomi’n a moinu kuang, “Rengpa mihring le mithi chunga lungkhamna irsam ngailoitu’n ama chu satvur ri se, kha mi kha kin urêng irnaipui tak a ni,” a tia.

²¹ Moab mi Ruthi’n, “A ni duah, bu hi an ât zoi mâka chu ki sinthotuhai laia hin sin sa mai ro, a ni iti kêng,” a tia.

²² Naomi’n a moinu Ruthi kuang, “A sa kha te, ki nâinu, a sinthotu dôngmatehai laia vai sintho ro, loi danga chu buaina ni tong itinin,” a tia.

²³ Khanchu, Ruthi’n chu Boaza siahlo dôngmatehai sinthoin a oma, barli le gohu ât zoi dênin faôi a zong irfuangin a om ngai. A tarpi kuang a om mai tâka.