ROM KHUAA MIHAI KUANGA TÎRTÔN PAULA LEKHATHON 8 - PATHIAN LEKHABU IRTHIANG C.L. Bible (BSI)

Irthaa hringna chu

¹ Khasika khan atûn chu Krista Jisua omhai ta hrangin chu thiamno inchangtirna zel om ta mah.

² Krista Jisuaa hringna Irtha dân khan sual le thina dân ata chu a nin suaktir tâka.

³ Taksa hrât loina sika dânin a itho thei viat loi kha Pathianin a zuang tho tâka; mihriam taksa sual ang irputin a Nâipa ngêt kha, sual irbôlna’n Pathianin a zuang tîra; taksaa sual om chu thiamno an changtir tâka;

⁴ taksa dâna om ta loi, irtha dâna om tâkhai, keinia hin dânin a inphût kha hlen suaka a om theina hrangin.

⁵ Taksa dâna omhaiin chu taksa tianga thilhai an nuama, irtha dâna omhaiin chu Irtha tianga thilhai an nuam ngai a ni.

⁶ Taksa tianga thil nuamhai chu thina a nia, Irtha tianga thil nuam chu hringna le irtharngamna a ni.

⁷ Taksa nuamlam chu Pathian a doia; Pathian Dân zôm maka, zôm khom zôm thei ual mah;

⁸ Khasikin taksa nuamlam anga omhai chu Pathian inlômtir thei mahai.

⁹ Pathian Irtha kha nin kuang a omin chu taksa mi ni ta mak chêia, Irtha mi nin ni ual ta a ni. Tukhom Krista Irtha nei loi chu ama mi ni mah.

¹⁰ Khan, Krista kha nangnia a omin chu nin takpum kha sual sika thi ni khomsian, thiam inchangtir nin ni tâk sikin nin irtha chu a ihring a ni.

¹¹ Mithi lai ata Jisua kaithoi nôkpu irtha kha nangnia a omin chu, thina irthoka Krista Jisua kaithoi nôkpu khan nin takpum thi thei kha nangnia ama Irtha inomtirin nin takpum thi thei kha inhring a ti.

¹² Khasika khan, urênghaio, lâkai ei nei, taksa dâna taksa taka hring hrang chu ni mah.

¹³ Taksa dâna nin omin chu nin ithi ngêt hrang a ni: aniachu, nin taksa irzuk lam thil sual thohai Irthaa nin thatpaiin chu hring nin ti.

¹⁴ Pathian Irtha hruaia om murdihai chu Pathian nâihai an ni.

¹⁵ Nin Irtha dong kha suak anga ichia nangni inomtir nôk hrang ni loiin nâia nangni siam hranga Irtha a ni ual; khasika khan, “Abba! ka Pa” tiin ei ikhêk suak ngai a ni.

¹⁶ Kha Irtha ngei khan einia irtha leh irkopin Pathian nâihai ei ni a nin hriattira.

¹⁷ Pathian nâihai ei niin chu ar chon luatuhai ei ni, Krista tuangna ei irkoppui ngêt hrang a ni.

Roiinpuina hong om hrang

¹⁸ Atûna tuangnahai hi nakana ei ta hranga roiinpuina inlang hrang leh khan irkhek inrukin bê ma ung.

¹⁹ Thil siam murdi’n chu Pathianin a nâihai a hong inlangtir zoro an nghâkhmo tak tak a ni.

²⁰ Thil siamhai chu an mâni nuamlam sik ni loiin, Pathian nuamlam sikin chanlamboi ni hranga hnôl an ni tâk, aniachu, sabei hrang a la om;

²¹ thil siamhai chu siatna suak ata insuaka omin, Pathian nâihai zalênna roiinpui kha an irkoppui hrang a nih ti sabeina a ni.

²² Thil siam murdi chu atûn ten nâiha irvei inrûm angin an inrûm tih ei inhriat a ni.

²³ Kha vai kha ni mah, eini Irtha ra masa dongtuhai ngei khom hi, a nâia a ni siam tika chu, nghâkhmo’n ei inrûm a ni.

²⁴ Kha sabeina sika khan saninhring ei nia; aniachu hmu tâk sabeina kha sabeina ni mah. A ihmu chian tâk kha chu tu mo la sabei mai hrang?

²⁵ Ei ihmu loi kha ei sabeiin chu ei inghâk zâm zâm ngai a ni.

²⁶ Khasikin Irtha khom khan ei hrât loinaa a ni changpui ngai. I anga chongchai hrang moh ti inhre mak meh. Irtha’n chu inrûm insîr theiloiin a ni chongchai pe ual a ni.

²⁷ Mi milung enfiatu Pathianin chu, Irtha insîr tum chu imo a nih ti an hriat; Irtha’n chu Pathian nuamlam ang takin a ni chongchai pea.

²⁸ Pathian lungthungtu, ama inkung anga a ikoihai hrangin chu, an satna hrangin itinrêngin a tho pe ngai tih ei inhriat;

²⁹ a lei inhriathai kha ama Nâipa ang taka om hrangin a lei inkunga; khanchu, a Nâipa chu urêng tamtak laia nâi lutîr tak a hong ini hrang a ni.

³⁰ Khan a lei inkunghai kha a koia, a ikoihai kha chu thiam an changtira, thiam a inchangtirhai chu a roiinpuina an changtir sa a ni.

Krista Jisuaa Pathian lungthungna

³¹ Kha thua khan imo ei insîr hrang tâk? Pathian chu eini tiang a changin chu tu’n mo ni doi thei hrang?

³² Ama Nâipa ngei khom hôi loia ei rênga hranga pêktu khan itinrêng manboiin a ni ipêk sa loi hrang ma ni?

³³ Pathian mi inthanghai chu tu’n mo hnôl ngam hrang? Pathian chu thiam inchangtirtu a nia.

³⁴ Tu’n mo thiamno inchangtir hrang? Krista Jisua mo? Ama chu ei ta hrangin a ithi vai ni loiin a thoi nôka, Pa Pathian chang tiang omin ni chong petu kha chu ama dên kêng a ini.

³⁵ Krista lungthungna ata chu tu’n mo ni sen thei hrang? Intakna’n mani, lungdûkna’n mani, dengintheina’n mani, châmin mani, korongboiin mani, khandaiin mani a ni isen thei hrang ma ni?

³⁶ Pathian Thu bu’n, “Nangma sikin sûn sôtin that zôi zel hmabâkin ki oma, Belra that hrang anga sia ki ni,” ti irziak ang khan.

³⁷ Thei no ni! Khahai murdi ata khan a ni lungthungtu sikin roiinpui taka ngamtu ei ni.

³⁸ Thina’n mani, hringna’n mani, vântîrtônin mani, inlalna’n mani, thil omsaiin mani, thil la om hrangin mani, sinthotheina’n mani,

³⁹ irsângna’n mani, inthûkna’n mani, thil siam dang rêng rênghai khomin ei Rengpa Krista Jisuaa om Pathian lungthungna ata chu ni sen thei no ni, ti kin hriat infel a ni.