ROM KHUAA MIHAI KUANGA TÎRTÔN PAULA LEKHATHON 7 - PATHIAN LEKHABU IRTHIANG C.L. Bible (BSI)

Irnei chongirkhek

¹ Urênghaio, dân nin inhriat intama, ki insîr hi irhmâi no chin ni; dânin chu mi a hring sûng vai an chunga ircham a inei mo ni ma?

² Dôngma chu a pasal a hring sûng ten a pasala dân khan a khita; khannisian a pasal a thiin chu a pasal ata dânin a ikhitna kha isûtin a om ngai.

³ A pasal hring laiin mi dang a neiin chu a iuire a nia; a pasal thi hnunga chu dân khitna ata ar kianga, mi dang nei khomsian uire ni ta mah.

⁴ Khaang tak kha a ni, ki urênghaio: Krista takpum ônhai nin ni tâk sikin dân chu nin thisan tâka. Pathian ta hrangin ra ei insua theina hrangin atûn chu mi dang ta, mithi lai ata kaithoitu ta kha ei ni.

⁵ Taksaa ei om lai khan dân sika ei inuamlam sual hong suakhai chu ei takpum ônhai thina hrang dôra ra hrangin sin a hong tho ngai.

⁶ Atûn hin chu, a ni khit ngaitu kha ei thisan tâka, dân ata ei irkiang ta: Dân thu irziak milui anga ni loiin Irtha dân tharin sin ei itho ual a ni.

Dân le sualna

⁷ Imo ei insîr hrang tâk? Dân chu sual ma ni? Ni mak e. Aniachu dânin nin hriattir no sian sual hi inhre no ning, dân khan, “Irzuk no roh,” ti no sian, irzuk hi ki inhriat loi hrang pial a ni.

⁸ Hi thupêk hi zoro’nchuma hmangin sual khan keimaa hin irzukna chi tinrêng an suaktira. Dân om no sianlân chu sual hi thil thi chian a ni.

⁹ Tiana khan chu dân kop loiin ki om ngaia, khannisian thupêk chu a hong oma, sual kha a hong hara,

¹⁰ kei chu ki thi tâka. Hringna hranga thupêk chu ki hrangin thina a hong ni ta.

¹¹ Sualin chu thupêk kha zoro’nchuma hmangin mi a huanga; a ni ithatpai tâk a ni.

¹² Dân kha chu a’rthiang kêng, thupêk khom a’rthianga, a fela, a isa a ni.

¹³ A ninole, thil sa khan ei ta hrangin thina a hong intung kêng na? Intung mak e. Sual kêngin a ni: Sual a nizia inlang hrangin thil sa hmangin ki ta hrangin thina a hong intunga, thupêk sikin sual irkhêlzia chu a hong inlang fel tâk a ni.

Mihriama irmîl thei loi

¹⁴ Dân chu irtha tianga thil a nih ti ei inhriat; kei chu mihriam mai mai, sual suaka zuar tâk ki ni.

¹⁵ Ki châng lam dân hi inhre thei ma ung, ki itho nuam chu tho loiin ki inuam loi kêng ki itho hen a ni.

¹⁶ Ki itho nuam loi kha ki tho’n dân kha a sa ki itipui sa tihna a ni.

¹⁷ Khanchu keima hi chu a thotu tak kha ni ma ung, keimaa sual om hi a ni ual.

¹⁸ Keimaa mihriam hi chu thil sa ite om mah ti kin hriat; thil sa tho nuamna nei ngai khom inlân, tho thei ma ung.

¹⁹ Ki itho nuam thil sa kha tho loiin ki itho nuam loi thil sual chu ki tho ngaia.

²⁰ Ki itho nuam loi lam kha ki tho’n chu a thotu tak kha keima hi ni ta ma ung tihna a ni; keimaa sual om hi a ni ual.

²¹ Hiang hi thil om lam a nih ti kin hriat suak ta: Thil sa ki tho nuam nâkin, thil sual ki tho nôk ngai.

²² Ki mihriam sûngrîlin chu Pathian Dân kha a lôma;

²³ Khannisianlân, ki takpuma hin a thotu, dân danglam tak a om tih kin hriat, kha khan ki sûngrîlin sa a iti lam dân kha a doia, sualna dân ki takpuma hong tho ngai suaka khan a ni siam chian a ni.

²⁴ Lunginkham om mi te ki nia na! Hi thina takpum ata tu’n mo ni sansuak ni?

²⁵ Pathian vaiin kêng! ei Rengpa Jisua Krista zâra ei Pathian kuanga lômthu ki insîr a ni. Khanchu, ki milung sûngrîl taka chu Pathian Dân a zôma, ki takpum hin chu sualna sin a itho a ni.