ROM KHUAA MIHAI KUANGA TÎRTÔN PAULA LEKHATHON 6 - PATHIAN LEKHABU IRTHIANG C.L. Bible (BSI)

Sual thisana Kristaa hring

¹ Imo ei insîr hrang tâk? Lungkhamna chu a pung theina hrangin ei isual nôk li lia hrang ma ni?

² Nâi sâi mak e, Eini sual thisan tâkhai chu suala itin mo ei la iom mai thei hrang?

³ Krista Jisuaa baptisma chang murdihai chu a thinaa baptis-in ei om thiai tih nin inhriat mo ni ma?

⁴ Baptisma ei changin a kuang phûmin ei om saa, a thina kha ei irkoppui a ni; khaang dênin, Pa’n mithi lai ata roiinpui taka Krista chu a kaithoi ang khan, eini khom hringna tharin lêng ta ei ti.

⁵ A ithi anga ama leh irzoma ei thiin chu ama kha a ithoi nôk ang dênin ama leh irzomin eini khom kaithoiin om sa ei ti.

⁶ Sual suaka ei om ta loina hrangin sual irput takpum hi thatpai hrangin ei mihriam milui kha a kuang hembe’n a om tah ti ei inhriat a ni.

⁷ Tukhom thi tâk chu sual ata a irkiang tâk a ni.

⁸ Khan, Krista kuang ei thi sa tâkin chu a kuang hring sa ta ei tih ti ei iiam a ni.

⁹ Krista chu mithi lai ata kaithoiin a oma, thi nôk ta no ni tih ei inhriat, thina khan a chunga ircham nei ta mah.

¹⁰ A thina kha sualna tiang chu thi theng thaina a nia, a hringna chu Pathian kuang hring theng thaina a ni.

¹¹ Khaang dênin nangni khom sualna tiang chu thi tâkin irbe unglân, Krista Jisuaa khan Pathian tiang chu a hringin irbe roi.

¹² Khanchu, nin taksa irzukna nangni inzômtir hrangin nin takpum thi theia khan sual hi inlal no ri se.

¹³ Nin takpum ônhai khom thil saloi thôna hrangin inhmangtir ta no roi; mithi lai ata hring nôk angin Pathian kuang inhlan unglân, nin takpum ônhai khom kha ama kuang felna hriamhrei hrangin pe ual roi.

¹⁴ Sual khan nin chunga ircham nei ta no nia; Dân hnuaia om maka, lungkhamna thuhnuaia nin om ual tâk sikin.

Felna suak

¹⁵ Itin mo a ini hrang tâk? Dân thuhnuaia om loia lungkhamna thuhnuaia ei om tâk sikin, sual ei itho nôk mai hrang ma ni? Ni mak e.

¹⁶ Tu kuang khom a thu zôm hranga a suaka nin lûtin chu, thina hrang tena sual suak mani, felna hrang tena thu zômna suak mani khom ni sianlân, a thu nin izômpu suak chu nin nih ti nin inhriat loi ma ni?

¹⁷ Sual suak ni ni tâka, khannisian, nangni an inhlan nôk Thurchi Sa irchutirna thu nin idong kha milung taka nin zôm sikin,

¹⁸ sual suak ata chu insuak nin ni, felna suak nin hong ni ta. Khasikin Pathian kuang lômthu om ri se.

¹⁹ (Nin inhriat theina hrangin mihriam dânin thu ki insîr a ni.) Nin takpum hrât loizia inhriatin, mihriam takin thu ki insîr a ni, nin takpum ônhai chu matona porinche le inchâina suaka insiat hrangin nin ipêk ngai ang khan, atûn chu felna suaka irthianga hring hrangin pe ual ta roi.

²⁰ Sual suak nin ni lai khan felna ata nin irkianga.

²¹ Atûna nin inzakpui tak, thil nin lei itho ngai kha, nin inlâppui mo? Kha khan a mong taka chu thina an tunga.

²² Atûn chu sual ata irkiang nin ni tâka, Pathian suaka nin lût tâk sikin kumtuang hringna chang hranga irthiangtir nin ni ta.

²³ Sual man chu thina a nia; Pathian thilmanboi pêk chu ei Rengpa Krista Jisuaa khan kumtuang hringna a ni.