ROM KHUAA MIHAI KUANGA TÎRTÔN PAULA LEKHATHON 5 - PATHIAN LEKHABU IRTHIANG C.L. Bible (BSI)

Thiamchangna ra

¹ Khasikin iamna sika thiam ei chang tâk sikin, ei Reng Jisua Krista zâra Pathian le irngeiin ei om ta.

² Ama sika ngêt khan atûn hin ei iomna lungkhamna hnuaia hin, iamna’n ei lût tâka, Pathian roiinpuina sabeina sikin ei ilôm sa a ni.

³ Khabana ei intaknaa khom ei ilôm mai a ni; intakna’n dorôina a siama,

⁴ dorôina khom khan detna a siama, detna khan sabeina an suaktir ti ei inhriata.

⁵ Kha sabeina khan bei nin dongtir maka, Irtha Irthiang a ni ipêk hmangin ei lungrîla hin Pathianin a lungthungna kha a zuang ibuak tâk a ni.

⁶ Ite tho theiloi ei ni lai khan, a zoro taka Krista chu mi sualhai hrangin a zuang thi tâka.

⁷ Mi fel ta hranga thi chu tu hrang khomin a sân intak a ti, mi sa ta hrangin chu thi ngam khom an om rôi mo.

⁸ Aniachu Pathianin lung a ni ithungna an langna chu, mi sual ei ni lai ata Krista kha ei ta hrangin a zuang thi tâka!

⁹ A thisen sika khan Pathianin thiam a ni zuang inchangtir tâka; Pathian ninginmurna ata khom ama zâra ni sansuak ngei a ti.

¹⁰ Râl ei ni lai lua khan a Nâipa thina zâra Pathian leh ei irngei tâkin chu Pathian leh irngeina ei om hnunga vâng chu Krista hringna sikin saninhring ni ngêt ei ti!

¹¹ Kha vai khom kha ni mah, atûna irngeina ni pêktu ei Rengpa Jisua Krista zâra Pathiana ei ilôm a ni.

Adama le Krista

¹² Rammuala hin mi inkhat sikin sual a hong lûta, sual sika khan thina a hong om ta. Khanchu rammuala mihriam murdi hi thina khan ar fang suak ta a ni, mi murdi’n thil sual an tho sikin.

¹³ Dân a om mân khomin rammuala sual a om ta, khannisian Dân a om no sikin sual kha suala ibe ni mah.

¹⁴ Khannisianlân, Abrahama zoro ata Mosia zoro dênin mi murdi chunga Adama’n Pathian thupêk zôm loia thil sual a itho tâk anga sual loihai chunga khom thina khan ircham a neia. Adama chu la zuang hrangpu leh irkhek a ni.

¹⁵ Khannisianlân, Pathian thilmanboi pêk kha Adama sual leh khan irang no tak a ni. Mi inkhat sual sika khan mi tamtak an thia; Pathian lungkhamna le mi inkhat Jisua Krista sika khan a thilmanboi pêk chu mi tam takin an idong a ni.

¹⁶ Pathian thilpêk le mi inkhat sual chu irang no tak a ni, mi inkhat sual sikin thiamno changna a hong oma, aniachu, sual tamtak sikin lungkhama thiam changna a hong om ta.

¹⁷ Mi inkhat, mimal sualna sika rammuala hin thina’n roi a rêl a ni tâkin chu, mi inkhat ngêt Jisua Krista sikin, Pathian lungkhamna irkhêl tak le thilmanboi pêk thiam changna dongtuhai chu, hringna changin roiinpui takin roirêl ngêt an ti.

¹⁸ Khanchu, mi inkhat sual sikin mi murdi thiamno inchangtir an nia, khaang dênin mi inkhat fel sikin mi murdi thiam changin an ihring thei tâk a ni.

¹⁹ Mi inkhat thu zômloi sika khan mi tamtak mi sual an ni tâka, khaang dênin mi inkhat thu zômna sikin mi tamtak mi fel ni an ti.

²⁰ Sual a pung nôk ual theina hrangin Dân a zuang oma; khannisianlân, sual a pung nôk ualin lungkhamna a pung nôk ual a ni.

²¹ Khanchu, sual chu thina’n roi a rêla; ei Reng Jisua Krista zâra kumtuang hringna ei nei theina hrangin Pathian lungkhamna khan thiam inchangtirna’n roi a irêl tâk a ni.