ROM KHUAA MIHAI KUANGA TÎRTÔN PAULA LEKHATHON 3 - PATHIAN LEKHABU IRTHIANG C.L. Bible (BSI)

¹ Khante, Juda mi nih a’rfê bîkna mo a om? Sertan khom imo a’rfêna?

² Lam tinrênga a sân an lâp; An lâpna tak chu Pathian thuhai inkoltir an inina hi a ni.

³ Mi senkhathai iamom ta no sianlân, itin mo ni ta ni? Anni iamom loina khan Pathian iamomna chu a inboi hrang ma ni?

⁴ Nâi sai mak e! mi murdi milak thei ni zit khomsian, Pathian chu a idik ngêt hrang a ni: “Nangin thu nin sîr zoro’n thiam ni changa, Roirêl pea ni om tika nin hnê theina hrangin,” tia irziak ang khan.

⁵ Ei dikloina khan Pathian felzia an langtir infel ualin te, itin mo ei irngai? Pathianin mi a hrem hin, mi felloi a ini ma ni? (Mihriam dân angin ki insîr a ni)

⁶ Nâi sâi mak! Pathianin itin mo rammual roi a irêl thei hrang?

⁷ A ninole, milak ki inina hin a roiinpuina hranga Pathian dikzia an langtir ual nôkin chu ithoa mo mi suala nin ni itep hrang?

⁸ Mi senkhatin “Thil sa a hong suak theina hrangin thil sual lei tho rei, a ti”, tia an ni hrilinsiat ang khan ei itho chian hrang ma ni? Kha mihai kha thiamno changrua pial an ni.

Tûte mi fel om mahai

⁹ Khante eini Judahai hi ei isa bîk ma ni? Nâi sâi mak e! Judahai le Grikhai chu sual suaka om zit ei nih ti kin insîr infel tâk kha te:

¹⁰ “Tûte mi fel rêng om mahai; Inkhat lua om mahai;

¹¹ Tûte inhre thiam rêng om mahai, Tûte Pathian zong rêng om viat mahai.

¹² A ni loina tiang an pêt zoi zit tâka; Ite khom hmang inruk ta loiin an om zit tâka; Tukhom thil sa tho reng om mahai; Inkhatte lua om ta mahai.

¹³ An hrok chu thân inhong a nia, An mileiin huangna thu an insîra, An hmûr ata mirûl tûr a suaka,

¹⁴ An bâi chu khuasâlna le thu khâin a sipa.

¹⁵ An ke chu thisen insuana hrangin a pêt hrâta;

¹⁶ An lampuia chu irhmangna le dengtheina a oma.

¹⁷ Irtharngamna lam khom inhre mahai.

¹⁸ An mit hmua Pathian chitna zel om mah,” ti irziak ang khan.

¹⁹ Dân thuhai chu Dân hnuaia omhai chunga hmang hrang a nih ti ei inhriat; tûte’n ite an insîr thei loina hrang le rammual hi Pathian roirêla a omna hrangin.

²⁰ Dan zôm insa sikin tûte Pathian makunga thiam changpui om mahai; Dân sikin mi’n thil sual an tho ti an inhriat fia ngai a ni.

Iam sika thiamchangna

²¹ Atûn chu Dân hmang ngai loia mi thiam an changtir lam Pathian khan a zuang inlangtir ta: Dân le deipuhai thu khomin kha kha a insîr a ni.

²² Jisua Krista an iam sikin Pathianin mi thiam a inchangtir a ni, tukhom a iam murdihai chu, danglamna zel om mah.

²³ Mi murdi’n thilsual an tho zita, Pathian roiinpuina kha an ichang thei ta loi a ni.

²⁴ Khannisianlân, Jisua Krista irtanna zâra Pathian chu a lungkhamna sika vai mi manboiin thiam an changtir ta.

²⁵ Pathianin ama kha a thisen tûng sika sual thupha chôina ni hrangin an kunga, mi thiam a inchangtir lam inlangtir hranga tho a ni.

²⁶ Atûn laia a felzia entirna hrangin kêng, ama ngei kha mi fel a ni theina hrang le, Jisua iam murdi chu thiam inchangtirtu a ni theina hrangin.

²⁷ Khante, song hrang mo ei neia? Nei mak meh! I sikin mo? Sintho sikin mo? Ni mak e, iamna sika kêng a ini.

²⁸ Dân zôm sika ni loiin iamna sikin mi’n thiam an chang ei iti a ni.

²⁹ Pathian chu Judahai ta bîk ma ni? Jentailhai ta khom a ni loi ma ni? Ni e, Jentailhai ta khom a ini kêng.

³⁰ Pathian chu inkhat a nia, sertanhai chu an iamna sikin thiam inchangtir a ta, sertan loihai khom an iamna sika ngêt khan thiam inchangtir a ti.

³¹ Khano’nte, iamna ei insîr poimo sikin Dân chu ite ni loia ei isia ta tihna ma ni? Ni mak e. Dân chu ei ithop ual a ni.